Alejandro Jato: «Tiña ganas de estar nunha serie do prestixio de "Serramoura"»

A incorporación do actor no papel de Brais será un dos pratos fortes do episodio desta noite


redacción / la voz

A punto percorrer os teatros españois coa montaxe Ilusiones, de preparar unha residencia artística e de estar cada tarde no serial de TVE Servir y Proteger, Alejandro Jato asegura estar moi feliz coa chegada de Brais a Serramoura. 

-Había ganas de estar en «Serramoura»?

-A verdade é que tiña moitas ganas de estar nunha serie que ten tanto prestixio dentro do panorama galego. Era a primeira vez que facía unha proba, e finalmente saíu un personaxe fantástico co que gocei moito.

-A súa incorporación no papel de Brais é un dos pratos fortes do episodio desta noite. Quen é esta personaxe?

-Brais é un rapaz que traballou en varios negocios antes de aparecer na vila de Serramoura. Todos eles fracasaron, porque Brais é un tipo do que non te podes fiar moito, pero é moi intelixente e sempre trata de facer as cousas á súa maneira, que acostuma ser á marxe da lei.

-A traxectoria da serie indica que todos os personaxes de «Serramoura» agochan algo. Tamén é así no caso de Brais?

-O pasado de Brais coñécese desde o principio, entón o que garda tampouco resulta ser un gran segredo. O que vai facendo ao longo dos episodios é pensar en novas estratexias para poder saír coa súa. En cada capítulo vaise metendo nunha serie de problemas e de camiños sen saída, que lle farán pensar moito e idear outros plans para evitar eses problemas.

-Brais supuxo algún reto desde o punto de vista da interpretación?

-Por sorte Brais é un personaxe bastante afastado de min [ri], pero o proceso de creación foi bastante fácil, porque definímolo moi ben cos directores e co resto de compañeiros. É un personaxe moi diferente a outros personaxes de Serramoura e á xente normal da que nos podemos atopar pola rúa, polo que o gocei moito. 

-Que significou para vostede participar na nova temporada de «Serramoura»?

-Unha cousa que me facía moita ilusión era traballar con compañeiros e amigos que xa coñecía de antes, pero cos que non tivera a sorte de participar noutros proxectos, como por exemplo Miguel Canalejo ou Tito Asorey, e foi un pracer traballar nun ambiente tan familiar como é Serramoura. Dende o punto de vista do actor, estiven moi cómodo cos directores, tivemos exteriores fantásticos e unha trama moi bonita na que puiden propoñer moitas cousas. 

-Como cres que será a acollida de Brais polos «serramourers» e todos os espectadores desta serie?

-Espero que ben [ri], aínda que ao principio Brais non é unha persoa que se faga querer. Está acostumado a facer o que lle dá a gana, pero tamén se lle verá un lado humano. É un personaxe con varias caras e está moi ben escrito desde ese punto.

-Que atoparán os espectadores no episodio de «Serramoura» desta noite?

-Moita tensión e moita aventura, porque é un episodio que gravamos con moitas ganas e con moito estímulo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Alejandro Jato: «Tiña ganas de estar nunha serie do prestixio de "Serramoura"»