Carlos Vila Sexto: «Antes de escribir imaxino as imaxes xa rodadas»

O guionista presenta en Ourense a súa novela «O pasaxeiro 19»


ourense / la voz

Coñecemos as historias que Carlos Vila Sexto (A Coruña, 1977) está a crear no día a día mais non somos conscientes de tal cousa. Escritor xa galardoado de mozo -aos 14 anos gañou o Premio Rúa Nova de narración infantil coa novela Alén de aventuras-, foi creador e guionista de series de televisión como Los misterios de Laura -a primeira na historia da televisión en España en ser adaptada nos EUA-, Motivos personales ou Un lugar en el mundo. En Ourense presenta hoxe -12.00 horas, libraría CyC- O pasaxeiro 19 (As crónicas do viaxante) (ed. Rodeira). Miguel esperta sen memoria nun tren e o primeiro que ve é un cadáver. Cando quere fuxir da escena do crime decátase de que alguén o incriminou no asasinato.

-Un tren en marcha e unha persoa que desexa fuxir condicionan o relato.

-Sempre fun un apaixonado da literatura infantil, das sagas e das triloxías. E quixen crear a miña propia triloxía, da que esta obra é a primeira entrega. E ese ambiente de presión e incerteza que se pode adiviñar é a miña particular homenaxe a creadores como Agatha Christie ou os autores da novela negra.

-Xa ten as outras entregas?

-A triloxía xa está rematada e as entregas están vinculadas a historias que sempre me resultaron atractivas: a segunda está relacionada cunha casa encantada e a terceira ten que ver con piratas. E todo co mesmo argumento e o mesmo protagonista. Como? Nas últimas liñas de O pasaxeiro 19 están as claves.

-Como compaxina os rexistros? Será un futuro guión?

-Emprego a mesma estratexia que nos guións que se fan para cine ou televisión. A novela está escrita para que o lector non se aburra e se enganche co misterio, a historia policial e algún episodio paranormal. Sobre a posibilidade de levala á pantalla é totalmente factible; de feito, antes de escribir imaxino as imaxes coma se xa estivesen rodadas, para saber se a historia vai funcionar.

-Falando de imaxes, vivimos a idade dourada das series?

-Si. Coa aparición de Netflix, Amazon, agora Movistar e outras plataformas todo mudou e miramos as series no móbil, na tableta, sen anuncios, ou pasas a fin de semana mirando toda a tempada dunha serie.

-Traballa nalgún proxecto?

-Agora mesmo estamos en Presunto culpable. Teño un proxecto para rodar en Galicia, mais non podo dicir nada ata que estea asinado.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Carlos Vila Sexto: «Antes de escribir imaxino as imaxes xa rodadas»