«A derradeira leición do mestre» de Castelao atópase co país ao que deu voz

En Marea e BNG critican a explicación «descafeinada» que Feijoo deu sobre o cadro

O cadro foi desembalado este mércores na Cidade da Cultura, onde se poderá ver a partir deste venres
O cadro foi desembalado este mércores na Cidade da Cultura, onde se poderá ver a partir deste venres

santiago / La voz

O 17 de agosto de 1945 presentábase en Bos Aires con motivo do Día dos Mártires Galegos o óleo A derradeira leición do mestre. Alfonso Daniel Rodríguez Castelao, a pesar da súa cegueira, recreou nun cadro de grandes dimensións a estampa número 6 do seu álbum Galicia mártir, publicado en Valencia en 1937, no que denunciaba a represión exercida polo bando franquista. Este mércores, despois de 73 anos, era a primeira vez que se vía en Galicia ese lenzo no que dous nenos choran ante o cadáver do seu mestre asasinado. Un feito histórico, tal e como o definiu o presidente da Xunta, Alberto Núñez Feijoo, que presenciou a desembalaxe da obra na Cidade da Cultura, nun acto no que tamén participaron pola importante simboloxía da peza representantes dos grupos parlamentarios da oposición -En Marea, PSdeG e BNG-, outros membros do executivo e representantes do Centro Galicia de Bos Aires, institución propietaria da pintura.  

O cadro exhibirase ao público a partir deste venres no Museo Gaiás, como eixe central da mostra Castelao maxistral, que se poderá visitar ata marzo, momento no que A derradeira leición do mestre regresará á Arxentina. A exposición tamén contará con todos os debuxos de Castelao sobre a educación, espazos protagonizados polo ensino, así como pezas que demostran a dimensión internacional que adquiriu esta obra e un apartado dedicado aos mestres represaliados.   

«Recibimos con emoción unha obra significativa, un símbolo para Galicia, pola man que a pintou, pola súa calidade e pola lección histórica que representa e a homenaxe que fai aos mestres», destacou o presidente da Xunta sobre o lenzo de Castelao. Tamén fixo fincapé na súa «carga simbólica, coa defensa da educación fronte ao fanatismo» e indicou que o cadro «reconcílianos coa xustiza e fainos sentir máis galegos». Unhas verbas que espertaron a crítica inmediata do portavoz de En Marea, Luís Villares, porque, anotou, «hai cousas que se deixaron de dicir. Hai elementos que son imprescindibles, porque o mestre que figura no cadro é un que foi asasinado, palabra que non foi mentada, e a evocación que fai Castelao é a de Alexandre Bóveda». Nese senso, indicou, a presenza da pintura en Galicia debe lembrar que «hai unha conta pendente con todos os galegos asasinados». Ademais, a deputada de En Marea neta de Alexandre Bóveda, Ánxeles Cuña, deixou a zona das autoridades.

Tamén a portavoz do BNG, Ana Pontón, lamentou esa falta de detalles: «Necesitamos coñecer a Castelao sen descafeinamento. Foi un nacionalista que defendeu esta nación e sufriu o exilio por iso [...]. Hai que poñer en valor o que supón este cadro, está denunciando o asasinato de Bóveda, o intento de aniquilación do nacionalismo polo fascismo». O portavoz do PSdeG, Xoaquín Fernández Leiceaga, avogou porque esta mostra sirva para acadar un maior compromiso da Xunta coa memoria histórica e a eliminación da simboloxía franquista.

o traslado do óleo

Escolta policial e unha embalaxe específica para resistir as diferenzas de temperatura

«Está en moi bo estado». A afirmación da técnica do departamento de exposicións da Cidade da Cultura Carmen Menéndez certificaba que o traslado iniciado a pasada semana do óleo de Castelao se completara segundo o previsto. Para esta histórica viaxe contouse cunha embalaxe específica, tendo en conta que ía ser sometido a moitas diferenzas de presión e de temperatura, ademais da manipulación, «que é sempre o momento máis crítico». Así, o lenzo estaba protexido por material ignífugo e que mantiña os estándares de humidade. Tamén tivo escolta policial para o seu traslado por estrada dende Madrid. Menéndez engadiu que, aínda que a obra tivo que ser restaurada hai unha década porque tiña unha rotura na súa parte inferior dereita, as súas condicións son adecuadas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
12 votos
Comentarios

«A derradeira leición do mestre» de Castelao atópase co país ao que deu voz