O Outono Fotográfico de Ourense desaparece logo de trinta e cinco anos

O certame denuncia a falta de axuda do Concello e este di que ofreceu alternativas


ourense / la voz

Era a crónica dunha morte anunciada, como se sinalou por parte da organización, e o Outono Fotográfico «morrerá» neste 2018 logo de trinta e cinco anos de actividade. Creado en 1983 da man do desaparecido director da Casa da Xuventude de Ourense, Benito Losada, o certame estaba coordinado nos últimos anos -dende a morte de Losada no 2011- por Xosé Lois Vázquez e Vítor Nieves.

Os dous compareceron onte en rolda de prensa no Liceo para confirmar o que xa foran anunciado polas redes sociais durante a fin de semana: non haberá Outono Fotográfico 2018. «A colaboración económica comprometida polo Concello de Ourense co festival para a 35.ª edición celebrada en 2017 non foi habilitada e, tras meses de absoluta opacidade informativa, o martes pasado, comunícasenos que, en definitiva, non se vai cumprir o acordado», sinalou Vázquez, director do certame. A mediados de xuño o responsable do festival xa colgara en Internet que o Outono podería desaparecer porque o Concello non pagaba os 9.000 euros comprometidos -dos 24.000 euros do presuposto total- e iso impedía, entre outras cousas, editar o catálogo que cada ano se publica a xeito de memoria do realizado nesa edición.

Dende o Concello, institución que non quixo posicionarse ata a comparecencia dos organizadores do OF, rexeitouse responsabilidade algunha na desaparición do festival e sinalouse que a institución municipal «ofreceu tres alternativas para seguir colaborando co Outono Fotográfico, opcións desbotadas pola organización». Concorrer ás liñas de subvención que o Concello ten habilitadas en Cultura e Xuventude -as axudas dos dous departamentos son compatibles- ou unha encomenda de xestión mediante un contrato administrativo de prestación de servizos -cedendo a marca ao Concello- foron os prantexamentos. As concelleiras de Cultura, Belén Iglesias, e Xuventude, Sofía Godoy, compareceron en rolda de prensa para facer pública a postura do Concello. A axuda pendente corresponde a Xuventude, concellería que argumenta que non hai factura presentada. 

OUFF, banda e treboada política

A desaparición do Outono, xunto coa anulación do OUFF 2018, a desaparición da Banda de Música e o risco que corren varios proxectos culturais da cidade provocaron onte unha aceda polémica política. Ourense en Común, PSOE e BNG cargaron con dureza contra a política cultural que esta a desenvolver o goberno do PP na cidade. O PSOE denunciou «o desleixo, incapacidade e excesiva burocratización».

De «canto máis mellor» á aposta pola presenza internacional

OOutono Fotográfico loce gabancioso no seu logotipo unha lenda -«Desde 1983»- e a data faino, segundo os responsables do proxecto, «o segundo festival de fotografía máis antigo do mundo». Se Ourense leva dende aquela apostando pola imaxe é grazas a Benito Losada, quen como director da Casa da Xuventude actuou sempre como catalizador de mil e unha iniciativas que foron marcando época, entre outros as Xornadas de Banda Deseñada, o Maio Xove, o concurso de relato para mozos e moitos máis. Aínda que con realidades moi diferentes, houbo un tempo no que Outono Fotográfico e a Fotobienal de Vigo eran dúas referencias para os fotógrafos e para os afeccionados á imaxe. Como ocorre coas iniciativas vinculadas á realidade institucional -a Casa da Xuventude dependía en tempos da Consellería de Familia- a cada nova convocatoria o OF sumaba: máis exposicións, máis cursos, máis cidades... sen tecer alianzas ou relacións con outros certames semellantes -como o de Vigo ou as Xornadas da Imaxe de Braga, entre outros-. Na actual etapa a aposta nesa liña é clara, con colaboracións con varios festivais de Portugal, Brasil e outros países. Segundo a estatística que onte se deu a coñecer por parte da organización do Outono Fotográfico, nestes trinta e cinco anos o certame da imaxe ourensán programou «máis de 2.035 exposicións (con 6.093 fotógrafas e fotógrafos participantes: 3.300 nos 28 anos con Benito Losada á fronte e 2.793 nos últimos sete anos)».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

O Outono Fotográfico de Ourense desaparece logo de trinta e cinco anos