Eva Iglesias: «Fágome a "rubia" cando quero»

A actriz e cantante interpreta a Concha no Land Rober da TVG

.

Eva Iglesias (Rianxo, 1987) mira directamente aos ollos, ri moito e ten un brillante incrustado nun dente que atrae a miña atención cada vez que o ensina. Falamos entre un compromiso e outro nunha ruidosa cafetería de Santiago, aínda que a personalidade do novo fenómeno da TVG crea unha atmosfera illante do barullo. Eva ocupa moito espazo. Como a Pantoja. Lean e entenderán

-Como leva a popularidade?

-Dende hai dous ou tres anos, recoñécenme moito máis pola rúa. Acércanse a pedir unha foto e a min encántame, porque iso é recibir moito cariño. Moitas veces non son consciente diso que me está pasando. Entro nun bar, por exemplo, e a xente xírase a mirar. Dáse máis conta meu marido que eu. Normalmente dinme: «Ti es...» e eu respondo: «Si, eu son», ha, ha.

-Chámanlle Eva ou chámanlle Concha?

-Chámanme polos dous nomes. Cando me chaman Concha, tamén me xiro.

-Vostede xa dixo que Concha é unha especie de adaptación da súa nai.

-Concha viviu dentro de min moitos anos. Cando era máis adolescente, porque aínda me sinto adolescente, e quedabamos as amigas, eu imitaba a miña nai e falaba como Concha, aínda que miña nai non fala exactamente así. En Land Rober saíu á luz.

-E que opina súa nai da imitación?

-Miña nai non o sabe. Ben, igual o leu por aí nalgunha entrevista.

-Non se queixa porque se moquee dela na tele?

-Non, non se enfada porque miña nai é unha burlona coma min. Ela é a primeira que me apoiou e confiou en min. Meu pai tamén, pero era o que me dicía que estudara.

-Teño unha amiga que di que súa nai non sabe nada das vodas reais, pero que seguiu a súa de principio a fin.

-Para todas as noivas, a súa voda é espectacular, pero eu vivín a miña dun xeito moi especial. Cando me ofreceron no Land Rober compartir cachiños da voda, aceptei, aínda que logo pensei: «Na que me estou metendo». Pero foi unha das cousas máis bonitas que me pasou na vida. Compartín moitas cousas coa miña nai. Ela nunca subira a un avión, e fíxoo cando fomos comprar o vestido con Carmen Lomana. Ó día da voda flipei cando cheguei á praza e había xente de Lugo, xente de Ourense... Saín do coche e saudei como se fora a infanta, ha, ha.

-E que tal a vida de casada?

-Pois como a de solteira. Pero eu animo a casar a todo o mundo. Supoño que haberá máis cambios cos fillos.

-Xa está pensando niso?

-Quero ser mamá, pero sen apuros. Cando o sexa comunicareino no Land Rober.

-Ten xa algunha frase viral nos colexios.

-Si. Chámame moito a atención porque os nenos son superfáns do programa. Ás veces, na rúa, dígolles: «Pero, ti ves o Land Rober? Se acaba moi tarde!». E os pais dinme que ata que remata non hai maneira de levalos á cama.

-Como era de pequena, boa estudante?

-Non, ha, ha. Nunca me gustou estudar. O que me gustaba era cantar. Era moi traste.

-Conte algunha falcatruada que fixera.

-Unha vez rompínlle o pau da escoba a miña prima polo lombo. Lévame cinco anos e sempre estaba chuzándome. Pero eu teño moito xenio. Eu poñía unha cinta no pelo e xogaba a ser Rambo, ha, ha

-Vostede que foi cantante de orquestra, gústalle o reguetón?

-Para ir de festa, si. Pero gústanme todos os estilos.

-A Pantoja, din.

-É a miña ídola, unha artista impresionante. Os compañeiros do programa regaláronme unha entrada para vela en Sevilla.

-E que tal?

-Impresionante. Im-pre-sio-nan-te. A voz que ten, como enche o escenario...

-Celta ou Dépor?

-Dépor.

-Defínase en poucas palabras.

-Extravertida, alegre, sinxela e cariñosa. Tamén rubia. Fágome a rubia cando quero.

-Que tal na cociña, deféndese?

-Nada. A verdade é que nunca tiven a necesidade. Todos os días baixo a comer á súa casa.

-E unha tortilla de patacas, tampouco?

-Home! Unha tortilla, si.

-Tatuaxes?

-Esta flor de loto [mostra o antebrazo dereito], un corazón, as iniciais dos meus pais e a palabra «love», porque o amor é esencial.

-Quen destes diría que é máis guapo, máis atractivo: Pedro Sánchez, Albert Rivera, Iván Ferreiro ou Roberto Vilar?

-Vaia pregunta! (Pensa) Roberto Vilar é o meu xefe pero... Pedro Sánchez é moi atractivo.

-É moi activa nas redes sociais?

-Menos do que debería. En realidade son un pouco vaga coas redes.

-Unha canción.

-Lela, de Dulce Pontes.

-Que é o máis importante na vida?

-A familia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
25 votos
Comentarios

Eva Iglesias: «Fágome a "rubia" cando quero»