O prazo para enviar contos aos Relatos de Verán remata o día 25

Os textos publicaranse durante agosto nas páxinas e na web de La Voz

De premio, unha viaxe a Dublín
De premio, unha viaxe a Dublín

redacción / la voz

Este agosto volven os contos dos lectores a La Voz de Galicia. O xornal convoca a 19.ª edición dos seus Relatos de verán, que se publicarán nas súas páxinas e na edición dixital ao longo do próximo mes. O prazo para presentar textos xa está aberto e remata este vindeiro día 25, data na que aínda se admitirán orixinais.

Haberá dous premios, un para persoas de 16 anos ou máis, que consistirá nunha viaxe a Dublín para dúas persoas, que inclúe a viaxe en avión de ida e volta, estancia de dúas noites en hotel en habitación dobre, en réxime de aloxamento e almorzo, e os traslados entre o aeroporto e o hotel. Para os participantes de ata 15 anos, o premio é unha tablet. Serán os propios lectores os que elixirán os gañadores, votando cos cupóns que a tal efecto o xornal publicará nas súas páxinas. Os remitentes dos cupóns tamén entrarán nun sorteo dun lote de libros de Biblos Clube de Lectores. Os gañadores daranse a coñecer en setembro.

Galego ou castelán

Os textos, que poden ser tanto en galego como en castelán, non deben exceder as 25 liñas mecanografadas de corpo 11 (uns 2.100 caracteres con espazos incluídos). Os orixinais deben acompañarse dos datos do autor (nome, idade, DNI, enderezo, teléfono, profesión e, a ser posible, unha fotografía) e enviarse ao correo relatos@lavoz.es ou por correo postal, gravados nun soporte informático, ao seguinte enderezo: «19.ª Edición dos Relatos de Verán de La Voz de Galicia (Premio dos Lectores). Avenida da Prensa, 84-85. Polígono Industrial de Sabón. 15143 Arteixo. A Coruña». Os participantes menores de 14 anos deben enviar os seus textos a través dos seus pais ou titores legais, que deben acompañar os seus datos en sinal de autorización. As bases completas poden consultarse en www.lavozdegalicia.es/cultura/.

Votación
1 votos
Comentarios

O prazo para enviar contos aos Relatos de Verán remata o día 25