Ribadavia estreará as montaxes teatrais de Pippo Delbono e Marianella Morena

A feira MIT traerá tamén a Galicia «The Table», premio no Fringe de Edimburgo

.

ourense / la voz

A Mostra Internacional de Teatro de Ribadavia reforzará na edición 2018 a súa aposta pola presenza internacional, ao tempo que manterá o seu compromiso pola igualdade -asinado na pasada edición-, potenciará o teatro de rúa e as presentacións de publicacións e a celebración de cursos de formación. A MIT desenvolverase do 14 ao 22 de xullo na capital do Ribeiro e entre as propostas que se inclúen no programa presentado onte hai que salientar as tres estreas internacionais -dúas delas con carácter estatal e a outra a nivel galego-. A Mostra estreará en España as montaxes La Goia, do artista italiano Pippo Delbono, e Ella sobre Ella, da directora e dramaturga uruguaia Marianella Morena. O director da MIT, Roberto Pascual, lembrou que Delbono e Morena «son dous grandes nomes do teatro contemporáneo internacional».

Para a xornada de clausura tamén se apostou por outra primicia. Neste caso poderá verse por vez primeira en Galicia, no auditorio do Castelo de Ribadavia, a montaxe The Table, de Blind Summit. Pascual salientou o feito de que a obra «foi premio do Festival Fringe de Edimburgo e é un dos mellores espectáculos do mundo segundo varios medios como The Guardian, Sunday Telegraph ou Chicago Sun Tribune». Na sección Tempadas de Igualdade o festival escénico programou as montaxes asinadas polas creadoras de A Panadaría, De Vacas, Marianella Morena, Natalia Menéndez, Laila Ripoll -que impartirá un obradoiro-, Cristina Collazo, Lanördika e Lali Álvarez.  

«Commedia...» 25 anos despois

A xornada inaugural da MIT 2018 chegará cunha estrea absoluta para reivindicar á propia Mostra e ao teatro galego. En 1993 estreábase en Ribadavia Commedia, un xoguete para Goldoni, de Cándido Pazo. Un cuarto de século despois, e nunha coprodución entre a Mostra e a compañía de Pazó, volverá ao punto de partida un dos espectáculos que rematou converténdose nun dos fitos da historia da escena galega -con máis de 200 funcións en toda a Península e Francia-. Para a ocasión o reto foi «repetir no posible o mesmo equipo creativo».

No apartado de espectáculos de rúa contarase coa presenza de obras como Emportats, dos valencianos de La Trócola; Rojo Estándar, de Lanördika -obra que fusiona danza e circo e que está dirixida por Rosa Díaz, fundadora de La Rous-; Musicoloco, de Fuman Artist; ou Ez Sub, dos portugueses Projecto EZ. 

Teatro nas viñas do Ribeiro

A adega Viña Costeira está a celebrar o seu medio século de historia. Así, nas instalacións da firma presentouse onte o programa da MIT, e entre as propostas deste ano figuran Io Circo e Iventi Teatro, que ofrecerán «teatro nun autobús entre as viñas do Ribeiro». Toda a programación da MIT 2018 pode consultarse en www.mitribadavia.com.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Ribadavia estreará as montaxes teatrais de Pippo Delbono e Marianella Morena