Cabanillas recupera o epitafio

Tivo que pasar medio século para que a súa lápida no Panteón dos Galegos Ilustres recolla os versos de «Vento Mareiro»


cambados / la voz

Por fin saldouse a débeda contraída con Ramón Cabanillas. O poeta encomendoulle á súa muller en 1915 que empregara os versos de Vento Mareiro para o seu epitafio: Quero na lousa que me de sosego / esta palabra que ten ás: Poeta / e esta palabra que ten luz: Gallego. Eudosia cumpriu e as palabras elixidas polo autor figuran no panteón de cemiterio de Fefiñáns (Cambados), onde foi soterrado en novembro de 1959. Pero o 12 de agosto de 1967 os seus restos mortais foron trasladados ao Panteón de Galegos Ilustres, en Santiago de Compostela, xunto cos de Rosalía de Castro, Asorey e Alfredo Brañas, e as palabras con ás voaron. Na súa vila natal, en Cambados, botábanas de menos e o académico Francisco Fernández Rei reivindicou durante anos que se recuperaran. «O mínimo é respectar a vontade dos mortos. Foi un desleixo enorme», lamentábase onte.

O que podería parecer cousa sinxela, complicouse máis da conta logo de que unha sentenza xudicial lle concedese ao Arcebispado de Santiago a propiedade da igrexa de Bonaval. «O Museo do Pobo Galego sempre se preocupou de abrir e fechar o panteón, de vixialo e mantelo pulcro e coa maior dignidade», explica Fernández Rei, pero o tempo pasou e a lousa de Cabanillas seguía orfa dos versos de Vento Mareiro.

Unha asociación cultural (Unha Grande Chea), primeiro, e o Concello de Cambados, despois, pedíronlle á Xunta que tomase cartas no asunto, e o propio Fernández Rei levou o caso ao padroado do Museo do Pobo Galego. Pasaron os anos ata que, hai uns meses, un parente do escritor, do que non transcendeu a súa identidade, resolveu o problema. O mércores, Francisco Fernández Rei e a neta do poeta, Aurora Vidal, acudiron a Bonaval cun ramo desas rosas vermellas e brancas que tanto aparecen na obra do cambadés.

Fíxose xustiza con Cabanillas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Cabanillas recupera o epitafio