Maruxa Mallo, Castelao e Souto apoian a Seone nas «Trece estampas da traizón»

A Fundación Luís Seoane acolle ata o martes a exposición «13 estampas da traizón»


A Coruña / La Voz

Con motivo dos 80 anos da súa publicación, a Fundación Luís Seone acolleu nos últimos meses a exposición 13 estampas da traizón que pechará o próximo martes. Neste álbum, un Seoane que tiña entón 27 anos «sinalaba aos responsables do golpe de Estado de 1936 e aos seus cómplices e poñía de manifesto a dramática situación da poboación civil por mor do conflito». Isto indican os responsables dunha mostra comisariada por María Antonia Pérez Rodríguez, profesora da Universidade da Coruña, que fixo a súa tese doutoral sobre Luís Seoane a través da prensa (1929-1979), e Silvia Longueira, licenciada en Historia e directora da fundación. O seu obxectivo con esta exposición é facer «un retrato do momento cultural e histórico que acompañou a súa publicación mediante un proceso de contextualización que inclúe obra plástica doutros artistas, documentación diversa e abundante bibliografía». Así, a visión da guerra de Seoane está reforzada pola doutros artistas galegos presentes na mostra como son Castelao, coa súa triloxía composta por Galicia Mártir, Milicianos e Atila en Galicia; Arturo Souto, con Dibujos de la guerra; e Maruxa Mallo con textos publicados en La Vanguardia, ademais dos debuxos, gravados e un óleo de Manuel Colmeiro e os debuxos que Camilo Díaz Valiño fixo estando na cadea.

Unha das cuestións sobre a que as comisarias centran o proxecto é que na mostra pode verse a influencia que nestas estampas de Seoane tiveron os representantes das vangardas históricas, algo reflectido nunha selección de volumes cedidos pola Real Academia Galega dos fondos pertencentes á biblioteca persoal do artista. Trátase de «catálogos de exposicións e monografías de valor excepcional que amosan o interese que Seoane tiña, xa entón, polas numerosas correntes artísticas que se estaban a desenvolver fóra das nosas fronteiras». Artigos de opinión, revistas, libros e folletos de propaganda política da época serven para documentar as circunstancias nas que naceron estas 13 estampas da traizón.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

Maruxa Mallo, Castelao e Souto apoian a Seone nas «Trece estampas da traizón»