Publican un ensaio inédito de Xohana Torres do ano 1972

O traballo sobre Santo André de Teixido gañara un premio etnográfico promovido pola deputación coruñesa


Santiago / la voz

Foi o traballo gañador, no ano 1972, da primeira edición do premio de Etnografía Federico Maciñeira da Deputación da Coruña. Porén, Teixido. San Andrés de Lonxe. Mitos e ritos, no que Xohana Torres facía un repaso polas tradicións e o contexto deste lugar, nunca chegara a ver a luz como publicación. Ata agora, que o organismo provincial e o selo Engaiolarte rescatan este ensaio cumprindo, ademais, un dos soños da propia escritora, que estivo traballando nesta edición até poucos días antes do seu falecemento o pasado setembro.

O editor de Engaiolarte e amigo da autora ao longo de 35 anos, Xosé Puga, explicou onte que este era o libro que probablemente máis ilusión lle facía a Xohana pola súa vinculación coa tradición e con Santo André de Teixido, que consideraba «o único mito universal galego». «Lembraba que o escribira cando non había documentación e cando a unha muller que chegaba a investigar non a tiñan en conta», evocou Puga durante a presentación da publicación xunto á vicepresidenta da deputación e responsable da súa área de cultura, Goretti Sanmartín.

Torres revisou o texto deste traballo co que gañara o premio, facendo emendas e creando un poema para o volume no que relacionaba o santo de Cedeira coa Virxe de Chamorro de Ferrol. «Viviu este libro e emocionouse coa súa edición, e mesmo lle caían as bágoas cando miraba a maqueta, xa que tiña unha espiña cravada que por fin puido quitar», explicou Puga. O libro, o primeiro de Xohana Torres publicado despois da súa morte, conta cunha coidada edición con fotos de Xulio Xil.

Goretti Sanmartín destacou que, coa edición do ensaio, a entidade provincial quere facer «unha homenaxe e un acto de desagravio a Torres por non ter sido publicado no seu momento un texto que recibiu hai 46 anos un premio da Deputación da Coruña». Engadiu que este traballo mostra a preocupación da escritora pola cultura e a identidade galegas, polas lendas e a paisaxe.

O libro foi presentado na sede da Fundación Eugenio Granell de Santiago, un espazo vinculado á escritora, segundo destaca a deputación, xa que no ano 1957 se desenvolveu nel un acto sobre a nova poesía galega e Xohana Torres fora a única muller participante.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Publican un ensaio inédito de Xohana Torres do ano 1972