Decenas de actos lembran a Victoria Moreno, a cacereña que ensinaba galego

O Día das Letras Galegas rende homenaxe a unha pioneira da literatura infantil

.

Santiago

O Día das Letras Galegas está dedicado este ano a María Victoria Moreno, escritora e profesora, considerada unha das pioneiras da literatura infantil e xuvenil galega. Ao longo dos vindeiros meses numerosas localidades acollerán actos de homenaxe a esta muller que naceu en Cáceres en 1939 e chegou a Galicia no 1963, onde viviu ata o seu pasamento no 2005 en Pontevedra. Toda a programación presentouse no Gaiás nun acto no que ademais do conselleiro de Cultura, Román Rodríguez, e os presidentes da Real Academia Galega e do Consello da Cultura, Víctor Freixanes e Ramón Villares, estiveron tamén a directora adxunta ao director da CRTVG, Rosa Vilas, e o viúvo da autora, Pedro Ferriol.

Haberá case medio centenar de actividades en Galicia de distinta natureza. Exposicións, obradoiros, contacontos, campañas institucionais, concertos, xornadas académicas e mesmo estreas de televisión. O acto central, o propio día 17 de maio, terá lugar en Pontevedra, na xunta extraordinaria e pública da RAG. Entre as mostras audiovisuais destaca a exposición itinerante comisariada por David Pintor, quen fixo o cartel deste ano en homenaxe a María Victoria Moreno e que percorrerá once concellos con doce paneis e dúas vitrinas con obxectos persoais da autora.

Pedro Ferriol, quen se escusou por non falar ben o galego e preferiu usar o castelán, agradeceu o esforzo feito na programación de tributo a quen foi a súa muller, «que merece esta homenaxe», xa que houbo certo silencio sobre a súa figura, apuntou. E recordou algunhas facetas da escritora que ao mellor non son tan coñecidas, como a censura á que foi sometida durante a ditadura de Franco, ata o punto de que se lle retirou o pasaporte. Rexentou unha librería en Pontevedra na que se lían libros censurados e daba cursos de galego, algúns deles de xeito clandestino.

Aínda que todos os escritores aos que se lles dedica o Día das Letras teñen as súas singularidades, apuntou Ramón Villares, hai dúas que fan moi especial a María Victoria Moreno: ser unha adiantada da literatura infantil e xuvenil galega que despois tantos éxitos lle deu a esta comunidade coa publicación de Mar adiante, obra pioneira neste xénero literario; e a capacidade de quen é «alófono e alóctono» para converterse en «autóctono e galegófono», xa que Moreno chegou a Galicia cando xa tiña 24 anos.

Escritora e docente

Pola súa banda, o presidente da RAG, a entidade que instituíu o Día das Letras Galegas, sinalou tres aspectos polos que se escolle ao persoeiro do 17 de maio: a significación da obra e da traxectoria da homenaxeada; a memoria histórica que se poida recuperar; e a súa significación na dinámica social, apuntou Freixanes. Román Rodríguez incidiu na dobre dimensión de Moreno como escritora e docente, e no feito de que demostrou que non hai límites para aprender un idioma. Finalmente Rosa Vilas recordou a programación da canle pública nestes días, que inclúe un especial biográfico da escritora, que se emitirá na TVG en horario de máxima audiencia; e a estrea dunha ficción sobre a vida de Rosalía de Castro, a primeira persoa á que se lle dedicou o 17 de maio. Co título Contou Rosalía, e ambientada no Madrid de mediados do século XIX, narra a súa paixón de escritora e o seu reencontro co historiador Manuel Murguía.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
7 votos
Comentarios

Decenas de actos lembran a Victoria Moreno, a cacereña que ensinaba galego