O impulso poético de Fernando Pérez-Barreiro

Un volume recolle toda a poesía en galego do tradutor e ensaísta, e que permanecía inédita na súa totalidade


redacción / la voz

Fernando Pérez-Barreiro Nolla (Ferrol, 1931-Lancaster, 2010) é coñecido sobre todo pola súa faceta como tradutor, con títulos tan senlleiros como o primeiro Shakespeare galego (Macbeth, 1972), as súas versións de narrativa chinesa (Flores e leña, 1982) ou o Premio Nacional que recibiu pola traballo conxunto coa súa dona, Teresa Barro, de traducir Alicia no país das marabillas.

Menos divulgada é a súa vertente poética, que ata o de agora se limitaba a un monllo de poemas en castelán publicados hai case setenta anos na revista Aturuxo. En realidade, a vocación pola lírica foi un piar central na súa vida literaria. Non en van, o propio Pérez-Barreiro escribiría que «o impulso poético é unha realidade primaria do ser humano». Confírmao Teresa Barro: «Escribise ou non escribise poesía, e escribiu moita que non publicou, vivía coma un poeta, no nivel que puideramos chamar heroico e superior da poesía [...]. Nunca vin a Fernando baixar dese nivel que chamo poético e que está dirixido polo espírito».

Ese poeta secreto revélase no libro Poemas do carricanto (Espiral Maior), que recolle a súa poesía galega, toda inédita, cun minucioso estudo biográfico e literario a cargo de Armando Requeixo e un epílogo de Xosé Luís Méndez Ferrín. Este último parte dun retrato colectivo -no que aparecen, entre outros, Gonzalo R. Mourullo, Filgueira Valverde, Franco Grande, Ramón Lorenzo e os propios Pérez-Barreiro e Ferrín- de premiados nas Festas Minervais para trazar outros dous retratos, o dos escritores que «amaban a lingua galega e a practicaban» e mais o dun Pérez-Barreiro que describe como «unha presenza próxima e fraternal». «Nunha literatura alta como é a nosa, os versos de Fernando sobresaen e constitúen un universo en movemento e en constante mutación formal e enunciativa, que non se contradí coa vontade de estilo e cunha orixinalidade radical capaz de sorprendernos», escribe Ferrín.

Poemas do carricanto preséntase mañá en Ferrol, ás 19.30 horas, no auditorio do antigo Hospicio.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

O impulso poético de Fernando Pérez-Barreiro