Premios da Crítica distingue oito eidos da creación en Galicia

Grupo Nove, Luís Emilio Batallán e María Luisa Sobrino son algúns dos premiados

.Os Premios da Critica de Galicia xa suman corenta anos distinguindo a creación no país
Os Premios da Critica de Galicia xa suman corenta anos distinguindo a creación no país

Vigo / La Voz

Antonio Manuel Fraga, na categoría de creación literaria; Luís Emilio Batallán, en música; María Luisa Sobrino, nas artes plásticas; Flor Maceiras, nas artes escénicas; o Festival S8, en cine e artes visuais; Grupo Nove, en cultura gastronómica; Marcos Pérez Pena, en investigación; e o programa Conciencia, en iniciativas culturais e científicas foron os gañadores da XL edición de los Premios da Crítica de Galicia.

Baixo o lema «40 anos facendo país para sermos máis nós», xuntáronse nun hotel de Vigo 350 persoas representativas dos diversos ámbitos da política, da sociedade e da actividade cultural galega, entre as que se atopaban Abel Caballero, alcalde de Vigo; Miguel Santalices, presidente do Parlamento de Galicia; Román Rodríguez, conselleiro de Educación e Cultura; Carmela Silva, presidenta da Deputación de Pontevedra; e Víctor F. Freixanes, presidente da Real Academia Galega, entre outros.

A obra Querido H. P. Lovecraft, de Antonio Manuel Fraga, foi recoñecida polo xurado pola «descrición dos personaxes cun par de expertas pinceladas breves que lle outorgan unha personalidade claramente única e fascinante». Na modalidade de investigación, premiouse o traballo A prensa en Galicia na Transición, de Marcos Pérez Pena (Xerais). E o programa Conciencia foi galardoado, pola súa banda, por seren «unha iniciativa de divulgación científica consolidada no tempo, optimizando uns recursos económicos cada vez máis minguados».

O premio a Luís Emilio Batallán no eido musical viu dado pola «súa traxectoria até a actualidade, a súa reivindicación e renovación da canción galega, a historicidade e dimensións das súas composicións, que forman parte xa da cultura galega e do imaxinario colectivo de varias xeracións». O xurado tamén quixo salientar a contribución de Batallán á difusión da poesía galega e á popularización de autores como Álvaro Cunqueiro, Celso Emilio Ferreiro ou Carlos Oroza.

A longa traxectoria de María Luisa Sobrino como docente e investigadora nas artes plásticas en Galicia valeulle un dos galardóns dos Premios da Crítica. E a directora da Escola de Teatro de Narón, Flor Maceiras, foi elixida pola súa traxectoria como actriz e directora e, «moi especialmente, como mestra comprometida cunha formación teatral íntegra concibida desde a base e desde as marxes, que ten o seu obxectivo primordial na igualdade de xénero concibida desde o presuposto da calidade artística», destacaron.

«S8 é un festival que sabe conxugar o novo e o vello, o internacional co local, non só servindo como escaparate do cinema galego, senón tamén como canteira da que xorden novos e novas creadoras», explicou o xurado o premio ao festival de cine da Coruña.

Finalmente, o grupo de cociñeiros Nove obtivo o seu galardón porque «souberon poñer en valor dende as súas orixes a materia prima galega facéndoa internacionalmente visible».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Premios da Crítica distingue oito eidos da creación en Galicia