Francisco Javier Fernández Davila gaña o Premio de Novela por Entregas de La Voz

A historia, de atmosfera mariña, está ambientado no Vigo dos anos da Guerra Civil e aparecerá no xornal durante o mes de agosto

Francisco Javier Fernández Davila gaña o Premio de Novela por Entregas de La Voz A obra, de atmósfera marítima, está ambientada no Vigo dos anos da Guerra Civil

Redacción

Un vello mariñeiro, no solpor da súa vida, sente a necesidade de relatar uns episodios decisivos que viviu na súa mocidade. Unha serie de acontecementos que se remontan aos anos da Guerra Civil e a Segunda Guerra Mundial, cando en Vigo confluíron algúns sucesos que, malia o seu carácter clandestino, tiveron un impacto histórico considerable. Este é o argumento que propón A senda de sal, a obra gañadora do Premio de Novela por Entregas de La Voz de Galicia, que se fallou onte no Museo Santiago Rey Fernández-Latorre nas instalacións do xornal. O seu autor é Francisco Javier Fernández Davila, enxeñeiro de profesión quen se estrea na novela con esta obra.

A senda de sal arranca co encontro entre este mariño e unha muller, a quen o home elixe para rescatar da memoria máis distante e relatarlle aqueles feitos nos que, aínda sendo case un neno, tivo unha participación crucial. Porque aquel rapaz, forzado pola ausencia do pai por mor da guerra, tivo que facerse cargo do barco familiar. Axiña as tarefas habituais da pesca empezarán a dar paso a outros transportes que de xeito soterrado afectarán a moitas vidas marcadas polo devir da Guerra Civil. A novela ambiéntase na costa sur de Galicia, onde a cidade de Vigo ten un papel destacado, xa que neses anos confluíron nela representantes dos dous bandos que pouco despois haberían de enfrontarse na seguinte contenda bélica de alcance mundial: aliados e nazis.

O autor da novela recibirá un premio de 10.000 euros e a súa obra aparecerá no xornal durante todo o mes de agosto, tanto na edición en papel como na web do diario. Cada un dos 31 capítulos estará ilustrado por Juan Carlos Abraldes. Esta edición do galardón que organiza La Voz coa colaboración de Ámbito Cultural de El Corte Inglés foi das máis altas no tocante á participación, xa que se recibiron 19 orixinais. Co gallo da celebración do 135 aniversario do diario as bases introduciron como valor positivo unha achega literaria de corte histórico, proposta á que a novela gañadora se adaptou de xeito cumprido.

No seu discurso, Fernández Davila agradeceu ao premio a motivación para «saír dos números e entrar nas letras» e destacou o papel de xornal como difusor cultural en tempos nos que «semella que o feito de escoitar está devaluado». Ás súas palabras seguiron as de Ramón Pernas, director de Ámbito Cultural, quen definiu o certame como «un punto de encontro que leva 17 anos reunindo á xente que escribe e produce cultura todos os días en Galicia». A eses 17 anos tamén se referiron o director de La Voz, Xosé Luís Vilela -«esa idade na que queres comerte o mundo: así nos sentimos nós»- e o conselleiro de Cultura, Román Rodríguez, para quen o premio é quen de reunir innovación e tradición, cun potencial para levar a literatura a «milleiros de fogares». O director do xornal, quen tivo unha lembranza especial para Carlos Casares e a reinaugurada casa-museo de Rosalía de Castro, tamén aludiu a ese carácter transversal da cultura e o xornalismo co tema histórico que trata a novela gañadora -«a historia sempre ten moito que dicir do futuro»- e puxo como exemplo desa transmisión de longo alcance o bico gravado no disco de ouro que leva a sonda Voyager, dende hai xa corenta anos, aos confíns do espazo exterior.

.

A historia será publicada no xornal ao longo do mes de agosto

A senda de sal chegará á súa cita cos lectores o vindeiro día 1 de agosto, cando se publique en La Voz de Galicia o primeiro dos seus 31 capítulos, que irán aparecendo ao longo de todo o mes. A novela terá cabida na edición web do xornal e nas Páxinas Literarias da súa edición en papel, nas que, como xa é tradicional, contarán tamén co seu espazo os relatos dos lectores. Esta xanela aberta á literatura, todo un clásico do verán galego, como foi definida onte na velada na que se coñeceu a identidade do autor da obra premiada, é unha boa mostra do interese que concita, ano tras ano, a iniciativa do xornal. O premio é, como o cualificou a presentadora do acto, a xornalista de V Televisión Gladys Vázquez, un formato literario que pon a proba as habilidades dos escritores, xa que deben adaptarse á narración por entregas.

Un enxeñeiro de profesión que se iniciou na poesía e que se estrea como narrador

Hai ocasións nas que os premios distinguen a autores de longa traxectoria e outras nas que serven para descubrir e impulsar as carreiras de escritores noveis. Este último é o caso de Francisco Javier Fernández Davila, nacido en Vigo en decembro de 1974. Formouse como enxeñeiro de minas na universidade da súa cidade natal, onde se especializou en Intensificación Enerxética. Dende o ano 2000 traballa asociado principalmente ao mundo do frío e actualmente é experto en refrixeración e soporte a vendas dunha multinacional do sector.

Foi precisamente o seu oficio o que o animou a arrimarse aos camiños da literatura. O ano pasado obtivo o primeiro premio de poesía Certame de Enxeñería sen Fronteiras, ao que seguiron outras distincións en Galicia, como os galardóns poéticos Victoriano Taibo ou Terras de Chamoso, así como fóra da comunidade, como o certame de narracións Ateneo de Béjar.

Nesta incipiente traxectoria foi importante a participación do gañador en diversos obradoiros de escrita creativa, impartidos por Clara do Roxo, quen afirma que é «un poeta tentando escribir prosa». Mentres agradecía emocionado o premio, Fernández Davila lembrou o papel da súa mestra na escrita, así como o da súa dona, responsable de que persistise na súa afección.

Votación
9 votos
Comentarios

Francisco Javier Fernández Davila gaña o Premio de Novela por Entregas de La Voz