O Bierzo lembra ao poeta Morales, pioneiro do uso do galego no XIX

Suso Varela Pérez
suso varela LUGO / LA VOZ

CULTURA

Colectivos e estudosos queren integralo na historia oficial da literatura galega

17 jun 2017 . Actualizado a las 05:00 h.

Antonio Fernández Morales (Astorga, 1817-Cacabelos, 1896) non forma parte da historia máis canónica da literatura galega a pesar de que en 1861 publicou en León un dos primeiros libros feitos en galego, Os ensaios poéticos en dialecto berciano, dous anos antes de Cantares Gallegos, de Rosalía de Castro.

Desde hai un tempo colectivos e institucións do Bierzo, coa axuda de estudosos das universidades galegas, recuperaron a súa figura e obra. E neste 2017, no que cumpren douscentos anos do seu nacemento, vanse a programar diversos actos e actividades cos que pretenden poñer ao poeta Morales no mapa da literatura.

«O afán que nos move é incorporalo de pleno dereito como un dos autores da literatura galega e tamén como unha relevante achega literaria do galego que partiu do Bierzo», sinala Héctor Silveiro, académico correspondente da Real Academia Galega polo Bierzo. Este profesor -que está a traballar xunto coa Real Academia e o Instituto de Estudios Bercianos na organización dun simposio sobre Morales, a celebrar nos días 15, 16 e 17 de setembro- destaca que o poeta xa estaba a escribir en galego en 1847, tal e como testemuñan unhas cartas inéditas que se darán a coñecer neste seminario.