Unha mirada á cultura galega dende o exterior

Montse García Iglesias
Montse garcía SANTIAGO / LA VOZ

CULTURA

SANDRA ALONSO

Xornalistas que exercen fóra analizaron a percepción que hai de Galicia

15 feb 2017 . Actualizado a las 10:33 h.

Como se ve Galicia dende fóra. Profesionais da comunicación que exercen no exterior foron os encargados de ofrecer esta mirada durante a xornada organizada onte en Santiago polo Consello da Cultura Galega. Os xornalistas Ramón Pernas, Gonzalo Cortizo, Pilar Falcón, Manuel Jabois, Miguel-Anxo Murado e Carlos G. Reigosa abordaron as eivas, potencialidades e a percepción que se ten noutras latitudes sobre a cultura galega.

O escritor e xornalista Ramón Pernas abriu o encontro incidindo en que a cultura galega é moi endogámica. Salientou, por exemplo, que nos últimos vinte anos ningunha obra teatral producida en Galicia xirou fóra, máis alá de citas puntuais, e que só un 1% dos libros escritos en galego foron traducidos a outros idiomas. Ademais, no transcurso da súa charla coa tamén xornalista María Xosé Porteiro, fixo fincapé no movemento Nunca Máis, que tras supoñer unha importante revisión do modo de ver a vida, quedou nun movemento romántico. «O Consello da Cultura Galega debería facer un barómetro de como nos ven fóra cada ano», suxeriu para rematar.

En canto aos estereotipos que de Galicia se impoñen no exterior, o escritor e xornalista Miguel-Anxo Murado afirmou que «hoxe os tópicos son case todos positivos: ser galego é unha cousa moi valorada». Engadiu que a súa relación co país é nostálxica e sentimental, incluso cando residía en Galicia, e asegurou que hoxe pode escribir dende calquera sitio onde haxa conexión a Internet. Pola súa banda, Manuel Jabois, que compartiu mesa con Murado, explicou que se usa moito o tópico da indefinición galega para aludir a accións do presidente do Goberno, Mariano Rajoy.