Ourense rematará o expediente de honra a Carlos Casares ao cabo de 14 anos de abrir o proceso

O 16 de maio será descuberta unha «placa-escultura» na súa memoria na praza Bispo Cesáreo


Ourense / la voz

A morte temperá de Carlos Casares (Ourense, 1941-Nigrán, 2002) xerou unha chea de iniciativas e propostas promovidas ao pouco do seu pasamento que tiñan como obxectivo manter viva a memoria dunha das figuras máis sobranceiras da cultura galega do seu tempo. De institutos a prazas e de cátedras a concursos literarios serviron para darlle continuidade ao legado do autor de O sol do verán.

O mesmo aconteceu na súa cidade, aínda que algo quedou a medio facer. Logo de promover o correspondente expediente de honra, a corporación municipal de Ourense acordaba por unanimidade declarar a Carlos Casares fillo predilecto. Foi nunha sesión celebrada o 4 de abril do 2003 e poucos días despois, o 25 de abril, a viúva do autor, Kristina Berg, recollía de mans do alcalde Manuel Cabezas o título honorífico. Ademais de nomear «fillo predilecto de Ourense» ao escritor desaparecido un ano antes, o Concello acordaba a colocación dun busto de bronce coa inscrición «O pobo de Ourense, ao seu fillo predilecto Carlos Casares Mouriño» que sería encargado a un escultor da cidade. E aí quedou a cousa, polo que onte se recoñeceu dende a institución municipal.

O alcalde, Jesús Vázquez Abad, mantivo unha xuntanza con representantes da fundación que leva o nome do escritor, co seu presidente, Xavier Casares, á fronte, e logo da reunión anunciouse que «o Concello de Ourense culminará o 16 de maio o expediente de honra aberto a Carlos Casares en 2003». Naquela altura procederase a descubrir unha placa-busto do escritor ourensán na praza Bispo Cesáreo.

No ano en que as Letras Galegas homenaxearán ao autor de Ilustrísima, a súa cidade superará unha asignatura pendente dende hai 14 anos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Ourense rematará o expediente de honra a Carlos Casares ao cabo de 14 anos de abrir o proceso