Justo Beramendi: «O celtismo é un mito nacionalizador como tantos, e cada pobo ten os seus»

Héctor J. Porto REDACCIÓN / LA VOZ

CULTURA

SANDRA ALONSO

O catedrático da USC escribiu un libro que trata de sintetizar, divulgar e facer amena a historia de Galicia

12 sep 2016 . Actualizado a las 05:00 h.

Nacido en Madrid, de nai vasca e pai madrileño, criado en Almería, e cunha avoa de orixe asturiano, tense por «un mestizo». Justo Beramendi (1941), hoxe «absolutamente galeguizado», é tamén catedrático emérito de Historia Contemporánea da Universidade de Santiago (USC) e leva estes días ás librarías, da man da editora Turner, a Historia mínima de Galicia, que quere ser «unha síntese o máis completa e amena posible».

-¿Por que é necesaria outra historia de Galicia?

-Eu creo que a divulgación é unha cousa interesante que os españois acostumamos descoidar. Non sei se é necesaria ou non, porque o mundo ten necesidades moito máis apremiantes, pero está ben que haxa un libriño que poida achegar, tamén fóra de Galicia, unha aproximación da nosa historia, do pasado.

-¿A idea é divulgar sen entrar en grandes profundidades?

-Divulgación non quere dicir falta de rigor. A idea é facer unha síntese accesible e amena para os que non son especialistas. Porque os historiadores, cando facemos cousas para o nosa tribo, somos dados a largar uns tochos intragables. E non é tan doado meter dende o Paleolítico inferior até as Mareas en apenas 250 páxinas.