Luz Pozo mergúllase no labirinto borgiano a través da súa última obra «Rosa Tántrica»

«Este libro é moi especial pola idade que teño. Levo moito tempo traballando nel», conta a autora, que vai facer 94 anos


a cORUÑA / lA VOZ

Unha vez máis, a poeta ribadense Luz Pozo Garza ten moito que celebrar, porque a pesares de estar a piques de cumprir 94 anos, a autora presentou onte, no local Portas Ártabras, o seu último poemario, Rosa Tántrica.

A obra, composta por sesenta e tres poemas, é froito duns dez anos de traballo, malia que, como explica Olivia Rodríguez, mestra en Teoría da Literatura na Universidade da Coruña, «Luz foi traballando aos poucos e sempre de forma intermitente neste poemario, de feito sempre andaba a quitar poemas e a engadir outros no seu lugar». Tanto é así, que aínda ca alegría da publicación, «rematar con este libro, con este auténtico labirinto borgiano, supuxo todo un alivio para ela», puntualiza a mestra Rodríguez.

Deste xeito, o libro está dedicado principalmente á figura do escritor arxentino Jorge Luis Borges, e nel, Luz Pozo tenta buscarlle un sentido «á morte, e moi especialmente, á vida despois desta», explica de novo Rodríguez. Como colofón da obra, Luz Pozo atopa as respostas que buscaba ao escribir a obra: a eternidade é real.

Na presentación participaron dous dos grandes amigos da autora, Claudio Rodríguez Fer e Carmen Blanco, que non dubidaron en felicitala polo traballo. Do mesmo xeito, tratouse dun acto cargado de grande emotividade, e no que as catro paredes do local Portas Ártabras quedaron pequenas para os moitos admiradores que onte se achegaron a felicitar á creadora. 

Sete décadas de historia

A publicación de Rosa Tántrica acontece tras varios anos de descanso por parte da autora, quen publicou Sol de medianoche, o seu último libro, no ano 2013. Porén, a propia poeta fala da obra coma «algo moi especial pola idade que teño. Levaba moito a traballar nela e isto significa que aínda podo discorrer», asegurou Pozo.

Case sete décadas pasaron dende que a creadora deu a coñecer Ánfora (1948), pero Pozo nega perder a forza e a teima «teño moitos, moitos proxectos aínda por levar a cabo», explica. E ademais dos proxectos de futuro, a autora recoñece que garda «moitos poemas sen publicar».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Luz Pozo mergúllase no labirinto borgiano a través da súa última obra «Rosa Tántrica»