Manuel María, un escritor tan prolífico como diverso

A antoloxía que publica La Voz retrata a un gran poeta


Redacción / La Voz

Manuel María, nado en Outeiro de Rei en 1929 e falecido na Coruña no 2004, viviu a literatura xa dende moi novo, pero a súa traxectoria como autor pode datar o seu inicio arredor de 1950. A partir de entón, non deixaría de escribir ata os seus derradeiros días, deixando como legado unha obra tan ampla -máis dun cento de títulos- como diversa. Aínda que destacou principalmente na poesía, cuns poemarios dunha calidade que o converteron nun dos autores máis relevantes da literatura galega da segunda metade do século XX, tamén cultivou o ensaio, o xornalismo e o teatro. Tampouco convén esquecer a súa faceta de divulgador e animador cultural, dende o seu papel como promotor de revistas poéticas ata as incontables conferencias e recitais que protagonizou.

De todo isto dá testemuño o libro Manuel María. Palabra viva de amor e afirmación, unha antoloxía a cargo de Mercedes Queixas Zas, autora tamén da informativa introdución que precede a escolma e que contextualiza ao escritor e a súa obra. O volume pode adquirise o vindeiro martes con La Voz de Galicia por 1,95 euros mais o prezo do xornal, e forma parte da colección coa que o diario se suma dende hai xa quince anos á celebración do Día das Letras Galegas.

O libro recolle un total de cincuenta e cinco poemas escritos en distintas épocas vitais de Manuel María. Complétase cunha pequena mostra da súa actividade teatral, unha peza breve titulada Auto da costureira.

A antoloxía ábrese con versos do primeiro poemario monolingüe de Manuel María, Muiñeiro de brétemas, onde combina o intimismo coa influencia das vangardas do comezo de século, como podía ser o caso do surrealismo. Seguirían outros títulos tamén representados na escolma, como Advento, que achega ao poeta a o ideario existencialista, e Terra chá, unha das súas obras máis célebres e celebradas, dedicada á paisaxe natural e humana da súa comarca de nacenza.

Mais tamén figura na escolma o Manuel María máis comprometido, autor de libros como Versos para un país de minifundios, Remol ou Os soños na gaiola. A identificación do poeta con Galicia, a súa lingua e a súa cultura, os episodios históricos e movementos de reivindicación nacional e de xustiza, é plena nos seus versos, aínda que nunca deixou de abordar outros temas como o amor ou a morte. As preguntas que se formula todo ser humano son as mesmas que dan forma á poesía de Manuel María.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Manuel María, un escritor tan prolífico como diverso