A CORUÑA / LA VOZ

Vicente Mohedano, da Asociación de Actores e Actrices de Galicia que organiza os galardóns, abriu onte a velada da 20.ª edición dos premios María Casares advertindo que todas as accións que se ían ver no escenario da gala estaban «interpretadas por xente real». Era a gran noite do teatro galego, dos actores. Pero despois de reivindicar a importancia do público, e tras o número musical 20 homes, tivo unhas palabras para lembrar a importancia da fundación das Irmandades da Fala, da que se cumpren cen anos. Ai, a palabra.

Onte foi tamén (sobre todo) a noite da compañía Teatro do Atlántico, que arrasou coa montaxe O principio de Arquímedes, que se impuxo en cinco das oito categorías nas que resultou finalista. Só Xardín suspenso, do Centro Dramático Galego, estivo a piques de facerlle sombra, coas súas tres estatuíñas. Pero é que a produción dirixida por Xulio Lago gañou os galardóns importantes: espectáculo, dirección, actor principal, actor secundario e adaptación.

Os compoñentes de Chévere foron os encargados de levar a festa de O principio de Arquímedes a todos os demais. Trasladaron o Rosalía ao mundo da ultranoite, «ese xénero nocturno, acabaretado e gamberro» que tan ben manexan, para poñelo fronte ao musical que se fai en Broadway pero con acento propio. Si, «como o que faciamos na sala Nasa», anotou Xesús Ron. A gala lembrou que xa hai 20 anos da morte, exiliada en París, da actriz que lle dá nome. E do exilio «de tantos profesionais» falou Montse Dopico, autora do Manifesto Galego do Día Mundial do Teatro. O teatro galego, advertiu, «malamente poderá pervivir xa non só no medio da política das navalladas aos orzamentos culturais, senón na trampa dunhas axudas que parecen concibidas para fomentar a dependencia».

Cunha escenografía de Suso Montero, cinco músicos (con tres temas compostos por Martínez Antelo) e nove actores -que tamén lembraron «á xente que nos anos 70 e 80 chantaron o teatro galego»- encheron de maxia o escenario durante case dúas horas.

Moi emotiva foi a entrega do premio de honra Marisa Soto á Revista Galega de Teatro, «que ten máis anos que a Asociación de Actores», chanceou Mohedano. Toda a xunta directiva da asociación subiu ao escenario para celebrar esta publicación, cuxo director, Antón Lama Pereira, eloxiou o labor das once persoas que loitan para sacala adiante.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

«O principio de Arquímedes» arrasa na 20.ª edición dos premios María Casares