A Xunta lanza un amplo programa que levará a Madrid e Bos Aires
16 ene 2016 . Actualizado a las 05:00 h.Dous días antes de que se fagan os catorce anos do falecemento no 2012 de Camilo José Cela, o conselleiro de Cultura, Román Rodríguez, achegouse onte a Padrón -nunha visita acaída, xa que a efeméride coincide cos 25 anos da apertura da casa-museo do escritor- para presentar a programación coa que a Xunta, a través da fundación de Iria Flavia, conmemorará neste 2016 o centenario do nacemento do nobel galego (11 de maio).
Co respaldo do Ministerio de Cultura, o Consello da Cultura Galega, Acción Cultural Española, a Biblioteca Nacional, a Deputación da Coruña, a Universidade de Vigo, Abanca ou a Fundación Biblioteca Virtual Miguel de Cervantes, entre outras institucións e entidades, a consellería proponse como principais obxectivos poñer en valor e reforzar o coñecemento da figura, da obra e do legado de Cela, subliñando, ademais, a relevancia do autor na súa época, no seu contexto social e cultural. Os promotores queren que isto serva tamén para fomentar a investigación, o estudio e o debate científico en torno á súa traxectoria vital e profesional, coas súas luces e as súas sombras.
Biblioteca Nacional
O amplo calendario deseñado inclúe exposicións, un congreso, cursos, un ciclo de cine, novas edicións, certames literarios, actividades escolares e diversos proxectos de dixitalización do fondo documental da fundación. Pero o seu atractivo central estará na mostra CJC 2016. O centenario dun nobel, que se inaugurará na Biblioteca Nacional, en Madrid, o próximo 23 de xuño (onde permanecerá ata o 2 de outubro). Comisariada por Adolfo Sotelo Vázquez, a exposición recalará un mes despois no compostelán Museo Centro Gaiás da Cidade da Cultura, o 11 de novembro (e poderase visitar ata o 19 de febreiro del 2017).
Pero a intención da Xunta, sinalou Román Rodríguez, é que os ecos deste esforzo traspasen fronteiras. Máis alá da capital do Estado, proxectará a figura do autor de La colmena no exterior coa mostra Arxentina na vida e obra de CJC, que, organizada pola Biblioteca de Galicia, estará en Bos Aires coincidindo co protagonismo de Santiago como cidade convidada na 42.º Feira Internacional do Libro que se celebra na cidade porteña. «Un atractivo máis para reforzar o papel de Galicia no maior mercado editorial de América do Sur», incidiu.
Xunto coa mostra principal, a programación inclúe outros proxectos. A fundación Cela acollerá tres exposicións ao longo do ano. De febreiro a abril exhibirase El rucio de Sancho, en conmemoración do 4.º centenario do pasamento de Cervantes. Entre maio e agosto será a quenda de Compañías convenientes. Diálogos de arte contemporáneos co home poliedro, mostra de arte contemporánea comisariada por Paula Cabaleiro na que colabora a Deputación da Coruña. E, a partir de setembro e xa ata fin de ano, as dependencias de Iria Flavia acollerán O gran coleccionista, que percorre as múltiples coleccións do escritor que se conservan na casa-museo de Padrón.
Fóra da sede, o legado de Cela será protagonista de maio a xullo na Biblioteca de Galicia a través da mostra Xoias que son revistas. A hemeroteca de CJC; mentres que a Deputación de Guadalaxara organizará no verán unha mostra arredor de Viaje a la Alcarria.