Manuel María será a figura homenaxeada no Día das Letras Galegas no 2016

A súa candidatura impúxose por maioría ás de Ricardo Carballo Calero e Xela Arias


Redacción

O escritor lucense Manuel María (Outeiro de Rei, 1929-A Coruña, 2004) será o autor homenaxeado no Día das Letras Galega no ano 2016, segundo anunciou hoxe a Real Academia Galega (RAG). Sobre a mesa da RAG estaban tres nomes: Xela Arias Castaño, Ricardo Carballo Calero e Manuel María Fernández Teixeiro. Os tres xa foron candidatos no debate o ano pasado, cando finalmente se elixiu a Xosé Filgueira Valverde, quen se impuxo por moi pouca marxe ás opcións de Celestino Fernández de la Vega. 

Hoxe foi elexido por maioría Manuel María. A súa candidatura foi promovida polos académicos Darío Xohán Cabana, Fina Casalderrey, Víctor F. Freixanes, Margarito Ledo, Xosé Luís Regueira e Manuel Rivas. O presidente da Academia, Xesús Alonso Montero, descatou a poesía "excelsa" do autor homenaxeado, ao tempo que a súa figura popular, o que o converte "nun gran aliado para a Academia para levar o galego" a todos os eidos posibles. Alonso Montero reforzou esta idea co feito significativo de que Manuel María figura, canda Rosalía, Curros e Celso Emilio, entre os escritores máis musicados. 

Manuel María ofrece un perfil moi enfocado á poesía, un eido no que está considerado unha voz fundamental na segunda metade do século XX, aínda que tamén cultivou outros xéneros, especialmente o teatro e as narracións infantís. Detste último afirmou onte Fina Casalderrey que foi alguén a quen a literatura para mozos en Galicia lle debe moito. 

Ademais, Manuel María foi un activo promotor da cultura galega. Percorreu todo o país -así como a emigración- coa súa participación en recitais e charlas, tivo unha faceta de editor e tamén política, ámbito na que exerceu como concelleiro. 

Coa súa escolla a Academia homenaxea a un autor de múltiples vertentes literarias, na que destaca a poética, culto e popular a un tempo, e coa que espera que arredor da celebración do 17 maio se desenvolvan numerosas actividades a prol da normalización do galego, arela na que tanto insistiu o propio Manuel María.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
13 votos

Manuel María será a figura homenaxeada no Día das Letras Galegas no 2016