O neto de Bóveda defende que o Día das Letras se lle dedique a Filgueira

Bibiana Villaverde
Bibiana Villaverde PONTEVEDRA / LA VOZ

CULTURA

A estatua de Alexandre Bóveda parecía aplaudir onte en Pontevedra o encontro do seu neto Valentín e o fillo de Filgueira Valverde.
A estatua de Alexandre Bóveda parecía aplaudir onte en Pontevedra o encontro do seu neto Valentín e o fillo de Filgueira Valverde. CAPOTILLO

Ambas familias aseguran que a suposta traizón é «unha lenda urbana»

09 jul 2014 . Actualizado a las 13:37 h.

Baixo a atenta mirada da escultura de Alexandre Bóveda, o neto deste galeguista fusilado en 1936 narra a relación entre a viúva (a súa avoa) e o homenaxeado nas Letras Galegas en 2015. «Eu coñezo perfectamente a relación que tiña a miña avoa Amalia con Filgueira Valverde. Unha relación entrañable», asegura Valentín García Bóveda. Fronte a el asinte o fillo do galeguista que moitos consideran un traidor: «Si, si, entrañable».

Dende que se deu a coñecer, na fin de semana, o nomeamento de Filgueira Valverde está sendo cuestionado incesantemente. Repróbase que fora alcalde de Pontevedra no franquismo, procurador en Cortes na ditadura, e sobre todo acúsaselle de non ter defendido a Bóveda no xuízo que acabou co fusilamento do galeguista.

¿Non defendeu a Bóveda?

Xosé Filgueira Valverde non acudiu a declarar. Non estaba citado. Nin el nin o resto dos galeguistas que deixaran o partido para defender un nacionalismo de dereitas, católico, fronte o agnosticismo que defendía a corrente maioritaria. «Non foi citado, non consta no expediente», replica Xosé Fernando Filgueira Iglesias. ¿Por que non foi? «Foi por unha conversa con Pepe García, o avogado de Bóveda», relata Filgueira Iglesias. Valorouse se era negativo ou positivo que os nacionalistas de Pontevedra que firmaran o manifesto da dereita galeguista fosen a declarar: «¿Cal ía ser a pregunta? ¿Vostede creou o partido de dereitas porque estes señores eran de esquerdas? Baixo xuramento ante un tribunal militar, a conclusión ía ser que a resposta dos galeguistas de Pontevedra condenou a Bóveda».