Fina Casalderrey: «Os pequenos lectores son máis novos ca nós, non menos listos»

Elena Larriba García
Elena Larriba PONTEVEDRA / LA VOZ

CULTURA

A autora le hoxe o seu discurso de ingreso na Real Academia Galega

22 nov 2013 . Actualizado a las 09:33 h.

Para Fina Casalderrey (Pontevedra, 1951) a literatura é vida. Fala dos seus oficios de docente e de escritora coa paixón de quen viviu o fervedoiro dos comezos da normalización nos oitenta. Hoxe pronunciará no Teatro Principal da súa cidade natal (19.00 horas) o seu discurso de ingreso na Real Academia Galega, que será respondido por Rosario Álvarez Blanco. A entrada da autora non só suma presenza feminina nesta institución que coida da saúde do idioma, senón que abre as portas ao xénero de literatura infantil e xuvenil.

-É a primeira autora de literatura infantil con cadeira na RAG. ¿Ese é un dobre recoñecemento para vostede e para o xénero?

-Hai outros académicos que escribiron literatura infantil, aínda que non estean nos catálogos que adoitamos facer para poñer a cada un nun sitio. Algo fixo Manuel Rivas. E moito máis Bernardino Graña. O que pasa é que a literatura infantil foi ese parente invisible durante moito tempo. Penso que se me coñece e recoñece por facer unha literatura que guste aos rapaces. Incluso paréceme un recoñecemento para os ensinantes que escribimos. Os Premios Nacionais de Literatura Infantil que hai en Galicia todos somos mestres.