O Fetega premia a obra «Gaivotas subterráneas»

A peza recibiu os galardóns ao mellor actor e espectáculo


ourense / la voz

O Festival de Teatro Galego de O Carballiño (Fetega) pechou onte as súas portas coa entrega dos premios da súa 24 edición. A obra Gaivotas subterráneas, de Voz Audiovisual, resultou a gañadora deste ano cos premios ao mellor espectáculo e ao mellor actor, que recaeu en Luís Iglesia.

A directora do festival, Josi Lage, subliñou onte a calidade de todos os traballos que pasaron polo auditorio carballiñés dende o pasado martes. Un nivel que se reflicte nas votacións feitas polo público -que foi quen decidiu o premio ó mellor espectáculo- xa que a menor das nota rozaba os oito puntos dos dez totais.

O premio ao mellor actor para Luís Iglesia -que comparte escenario con Xabier Deibe- foi concedido por un xurado que resaltou a súa calidade interpretativa, o seu cambio corporal e vogal e a súa maxistralidade sobre o escenario.

Gaivotas subterráneas competiu no festival con Románticos de Mofa e Befa, e co Método Gronholm de Talía Teatro. Carlos Blanco foi o encargado de por onte o punto e final ó festival co espectáculo Ao vivo... de momento, nunha noite na que tamén se concedeu o premio honorífico Fetega 2013 a Eduardo Alonso, autor, adaptador e director de teatro, pola súa contribución á escena galega.

«Se algo pode caracterizar ao Fetega é a calidade. A edición deste ano foi brillante e excepcional, tanto polos espectáculos que se puideron ver como pola resposta do público na sala», relatou onte Lage que destacou o traballo dun ano enteiro para conseguir achegar ata a vila do Arenteiro os mellores espectáculos que este ano percorreron Galicia.

«Custounos moito poder ter unha programación como a que tivemos. Sen a colaboración das institucións e das empresas privadas sería imposible que a cita seguira. O Fetega ten que caracterizarse por ofrecer o mellor que se está a facer en Galicia e este ano conseguímolo con creces».

O Festival de Teatro Galego do Carballiño avanza agora de cara á celebración súas vodas de prata. «Será todo un reto. Loitaremos para sacarlla adiante pero estamos convencidos de que a 25 edición do Fetega será inesquecible», destacou Josi Lage.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

O Fetega premia a obra «Gaivotas subterráneas»