Xesús Fraga gaña o Raíña Lupa co relato dun grafiteiro

A novela inclúe un resumo en versión rap de cada capítulo


Redacción / La Voz

É grafiteiro e ten intención de encher a cidade cos seus deseños e a súa firma. O seu nome non é importante, pero o seu alcume si: Reo. Este é o personaxe principal da novela gañadora do premio Raíña Lupa de literatura infantil e xuvenil que onte fallou a Deputación da Coruña. Reo é tamén o título da novela escrita por Xesús Fraga, na que o adolescente fala en primeira persoa.

O xurado do premio salientou a «temática actual e a linguaxe directa para rescatar valores». Xesús Fraga, escritor, tradutor e xornalista de La Voz, explica que o seu protagonista ten un obxectivo definido: «Quere ter a cidade cuberta cos seus graffitis porque ese é o seu xeito de vivir».

A historia que conta o protagonista transcorre ao longo dunha semana, a semana final do curso. «Xusto cando ten que decidir que vai facer da súa vida: ir á universidade ou deixar de estudar», apunta o autor. A través do protagonista van aparecendo outros personaxes: «Un pai delineante ao que botan do traballo, unha rapaza brasileira á que queren devolver ao seu país e os seus dous irmáns, xemelgos, que teñen un dúo de rap chamado Dobre Dose».

Xesús Fraga explica que hai homenaxes que teñen que ver cun xénero, o xuvenil, no que se achega ás cousas que lía cando tiña o tempo do protagonista. Homenaxes a autores como Salinger, Neira Vilas e tamén a Roald Dahl.

Ese xeito de aproximarse á historia é tamén o que explica o autor para entender o personaxe: «Cando era adolescente eu sentíame diferente a todo o mundo aínda que non o fose tanto, creo que esa sensación repítese dunha xeración a outra e esa é a perspectiva coa que me acheguei a Reo». No mesmo sentido tamén apunta que escolleu «a primeira persoa como forma narrativa porque é como estar escoitándoo falar».

Xesús Fraga apunta que é un rapaz «convencido do que quere facer, utiliza o graffiti como medio de expresión, pero non é un vándalo: non pinta en monumentos».

Ademais de regresar á súa adolescencia, Fraga tivo que rapear para a novela: «Cada un dos capítulos leva como un resumo no que os dous irmáns rapean sobre o que sucedeu».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
10 votos

Xesús Fraga gaña o Raíña Lupa co relato dun grafiteiro