A edición número 30 do galardón resolveuse a favor dun novo veterano das letras galegas e un debutante na literatura para cativos
08 jun 2013 . Actualizado a las 21:54 h.A edición número 30 do premio Xerais resolveuse a favor dun novo veterano das letras galegas, Xabier López, e un debutante na literatura para cativos, Antonio Fraga. Os dous gañaron na illa de San Simón o premio Xerais de novela, dotado con 15.000 euros, e o Merlín, con 10.000, destinado a literatura infantil.
Antonio Fraga debuta na literatura con O Castiñeiro en abril. Unha novela para público infantil, presentada baixo o lema Sochantre de Pontivy, da que o seu autor advirte que non ten «unha linguaxe condescendente, nin que tente abrandar o que sucede para os seus lectores». O xurado do Merlín apuntou que este libro recollía todas as virtudes que se poden pedir a un libro destinado a lectores novos.
Antonio Fraga naceu en Pontedeume en1976. Estudou Enxeñaría Técnica Industrial en Ferrol ata que, en 2006, mudouse para o barrio de Monte Alto da Coruña, cidade na que traballou na refinería de petróleo. Viviu despois en Alcañiz (Teruel) e no inverno de 2010 trasladouse a Romanía, onde participou na construción dun parque eólico. Tras o seu regreso da emigración, comezou a escribir.
Xabier López López (Bergondo, 1974) é licenciado en Dereito pola Universidade da Coruña. Veciño de Betanzos, na actualidade dedícase profesionalmente á escritura, con especial atención á narrativa. Deuse a coñecer en 1997 coa obra xuvenil Biff, Bang, pow!, á que seguiu a novela Doutor Deus (1999), publicadas as dúas por Sotelo Blanco edicións. Coa novela O caderno (2001), Xabier López López obtivo o Premio Risco de Literatura Fantástica; con O mono no espello (2002) o Premio Lueiro Rey de novela curta e con A vida que nos mata (2003) o Premio García Barros e o Premio da Crítica, novela publicada pola editorial Galaxia, na que tamén aparecerían A estraña estrela (2003), Trinta e dous dentes (2007) e Os libros prestados (2010), publicada recentemente en castelán. Para o público infantil e xuvenil publicou A vella quenlla perde os dentes (2005), Cando Artur non era rei (2012) e Son un can! (2013). A esta altura agarda a aparición da novela para público infantil e xuvenil O segredo da vella libraría pola editorial Everest e da titulada 1989 por Biblos Clube de Lectores.