De Corfú á gloria

Xavier Alcalá
Xavier Alcalá A DOS BANDAS

CULTURA

24 may 2013 . Actualizado a las 07:00 h.

Corfú é unha illa chea de belezas varias, cuns sorprendentes oliveirais sombrizos onde as oliveiras parecen xigantes. É doado atopar alí xente que fale italiano, abundan as lembranzas do poder de Venecia e asusta a proximidade de Albania, a onde se pode ir a nado.

De Corfú era un matrimonio xudeu de apelido italiano que se trasladou á grande cidade culta de Exipto, Alexandría. Nela naceu Guiseppe Mustacchi. Coa familia viñeron os idiomas italiano e o grego; da rúa veulle ao rapaz o árabe. Da escola, o francés. Co tempo faría versos ou os cantaría tamén en catalán, castelán, portugués e inglés: un fenómeno de multiglosia ao que cómpre engadir a súa habilidade con varios instrumentos musicais.

Non o coñecemos co nome que lle deron os pais e o apelido italiano senón como Georges Moustaki, polo que o supuñamos francés de apelido grego. Cando andabamos nas batallas de fins dos sesenta, Moustaki chegou ao máximo do impulso emocional cunha canción que falaba dun estranxeiro, Le Métèque. Converteuse nun ídolo da esquerda, co cabelo e as barbas ao desleixo incitaba á revolución permanente. Dicían que era trotskista.