Teatro do Aquí recupera a lucidez das «Criaturas» de Vidal Bolaño

Camilo Franco SANTIAGO / LA VOZ

CULTURA

Belén Quintáns, presentando a nova versión da penúltima obra de Vidal Bolaño.
Belén Quintáns, presentando a nova versión da penúltima obra de Vidal Bolaño. conchi Paz

A compañía do dramaturgo produce unha obra que foi premio Max

14 mar 2013 . Actualizado a las 11:47 h.

«Era case unha obrigación que Teatro do Aquí representase a Roberto Vidal Bolaño no seu Día das Letras Galegas». Belén Quintáns, cofundadora da compañía xunto con Bolaño, explicaba así o motivo polo que Criaturas volve ser obra de teatro doce anos despois de ser estreada por primeira vez.

A montaxe, que terá as súas primeiras funcións en abril en Narón, onde tamén foi estreada a súa primeira versión, «conta case co mesmo equipo artístico e técnico» e ten a vocación «de moverse no mesmo ámbito co se estreou», segundo explicou Quintáns.

En coprodución co Centro Dramático Galego, coa colaboración da Agadic e da SGAE e coa produción técnica de Kachet, Criaturas está dirixida por Evaristo Calvo, quen asegurou na presentación que o seu cometido neste traballo como director era «seguir o camiño marcado por Vidal Bolaño». Calvo apuntou que os personaxes e a historia que conta a obra, que ten como referencia o Frankenstein de Mary Shelley, «é como de agora mesmo e ten a mesma vixencia que teñen todos os clásicos».

O reparto de Criaturas que estará en Santiago en maio e en decembro, mantén a dous dos intérpretes da súa primeira versión, Belén Constenla e Vicente de Souza. Os outros dous serán Marcos Orsi e Xoán Carlos Mejuto, un actor habitual nos repartos de Teatro do Aquí.

O director da SGAE en Galicia, Juan Carlos Fernández Fasero explicou na presentación que era «fundamental para a SGAE celebrar ao primeiro socio da entidade ao que lle dedicaban o Día das Letras», mentres que o secretario xeral de Cultura, Anxo Lorenzo, sinalou que a colaboración de «varias institucións nas producións como Criaturas serve para darlle máis profundidade á difusión da cultura».