Sede vacante na Academia Galega

En só sete días a RAG quedou sen presidente e inmersa nunha enorme polémica interna


Redacción / La Voz

A Real Academia Galega viviu nos últimos sete días unha das semanas máis intensas da súa centenaria historia. En cuestión de horas o seu presidente anunciou que abandonaba o cargo, e mesmo a Academia, e as palabras do secretario avivaron unha polémica interna cun longo percorrido por diante.

Domingo 24

Día de Rosalía en Padrón. Ferrín toma a decisión de abandonar na semana anterior, cando lla comunica ao seu círculo máis próximo. Pero a renuncia se mantén en secreto durante a fin de semana, na que participa como presidente da Academia no acto oficial de homenaxe a Rosalía que ten lugar na Casa da Matanza de Padrón o domingo 24, aniversario do nacemento da escritora e data na que comeza a celebración do 150.º aniversario da publicación do poemario Cantares Gallegos. Tras asistir á homenaxe oficial en Padrón, algúns membros da Academia encabezados por Ferrín reúnense nun xantar en Pontecesures, pero os asistentes non poden imaxinar que na mente do presidente da RAG xa é firme a idea de renunciar ao cargo.

Luns 25

Unha entrevista desata a polémica. Os acontecementos precipítanse ao día seguinte. A xornada comeza coas reaccións, dentro e fóra da rúa Tabernas, ás declaracións que o secretario da Real Academia Galega, Xosé Luís Axeitos, fai nunha entrevista publicada en La Voz de Galicia. Axeitos atribúe directamente a académicos que son tamén membros do Instituto da Lingua Galega e do Consello da Cultura Galega unha operación para facerse co control da RAG: «O ILG e o Consello da Cultura queren colonizar a Academia». Na mesma conversa Axeitos tamén responde as acusacións formuladas polo que el considera sector crítico.

Luns 25, 15 horas

Dimisión por correo electrónico. Cando as redes sociais e os medios culturais ferven coas reaccións ás palabras de Axeitos, arredor das 15 horas do luns a secretaría da RAG remite a todos os académicos, numerarios e correspondentes, un correo electrónico no que Ferrín lles comunica a súa dimisión.

A despedida

«Beizón tamén a estes e estas». O e-mail corre como a pólvora pola Rede. No texto, pulido polo Ferrín poeta parágrafo a parágrafo, dá «as grazas e un abrazo» aos catro membros que comparten con el a dirección da executiva. «Á maioría dos académicos e académicas» agradécelles «o seu labor ilusionado, a súa lealdade institucional e cooperación eficiente». Pero garda unha mensaxe para o sector crítico: «Outros académicos e académicas, unidos a persoas externas, fixéronme sentir que eu non teño sitio na Academia. Beizón tamén a estes e estas porque os seus esforzos, finalmente coroados por un éxito completo, tiveron a virtude de me facer ver a tempo onde debo estar e onde non debo estar nos poucos días que me resten de vida».

Martes 26

Rivas: «Teño que repensar se quero continuar na Academia nesta situación». Ferrín decide gardar silencio, pero as reaccións á súa renuncia sucédense o luns e o martes, cando membros destacados da RAG cualifican a dimisión como «desproporcionada». Vai máis alá un dos rostros máis coñecidos da institución, o escritor e xornalista Manuel Rivas, que pide a Ferrín que siga no cargo e anuncia: «Teño que repensar se quero continuar na Academia nesta situación».

Mércores 27

O Consello da Cultura entra en xogo. 48 horas despois da publicación da entrevista con Axeitos, o Consello da Cultura Galega entra en xogo cun comunicado publicado na súa páxina web no que nega categoricamente calquera interferencia na Academia. A Asociación de Escritores en Lingua Galega e o Centro Pen Galicia súmanse á petición de Rivas de que Ferrín esgote o mandato.

Xoves 28

Primeiro acto público de Ferrín desde a dimisión. O xoves ás 12.30 Ferrín entra en medio dunha nube de fotógrafos e xornalistas no salón de actos da Academia. Toca presentar o Dicionario de restauración, pero as preguntas van por outro lado. «Non hai comentario», despexa Ferrín, que só varía o guión para dicir que informará «ao seu debido tempo» sobre se reconsidera a súa decisión. O ILG tamén remite un comunicado negando que queira controlar a RAG e Axeitos engade unha frase para a polémica: «Eu falei de colonización, non de sodomización, que é o que semella polas reaccións». O académico e presidente do Consello da Cultura replica: «A tensión créana os mesmos que a denuncian».

Venres 1 de marzo

O último acto público de Ferrín xa ten data e hora. En medio da polémica a Academia colga a última hora da tarde do venres 1 na súa páxina web a convocatoria para o que «será o último acto presidido por Xosé Luís Méndez Ferrín». A cita é ás 12 horas do sábado 9 de marzo, na sede da Real Academia Galega. O escritor e xornalista Xosé Fernández Ferreiro ingresará na corporación cun discurso titulado Breves reflexións sobre os escritores e os xornalistas ao que dará resposta Manuel Rivas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
7 votos

Sede vacante na Academia Galega