O Premio Abrente de textos teatrais, convocatoria que desde hai sete anos mantén a Mostra de Teatro de Ribadavia co nome do colectivo pioneiro na organización do festival da capital do Ribeiro, quedou este ano deserto por considerar o xurado que non existía un texto que fose merecedor deste galardón. A organización da MIT 2012 tiña convocada para a mañá de onte a rolda de prensa na que se ía dar a coñecer o nome do autor galardoado, aínda que a cita foi desconvocada horas antes.
Ademais do alcalde de Ribadavia, o concelleiro de Cultura da vila e do director da MIT, no xurado figuraban Vanesa Sotelo, gañadora da edición do pasado ano; Manuel F. Vieites, director da ESAD de Galicia, e a actriz Sonia Rúa. No comunicado no que se dá conta da decisión, o xurado salienta «a variedade, a riqueza temática das obras presentadas a concurso», en especial as rexistradas baixo os lemas Bielmeier, MAD e Flanagan -neste último caso salientan o «potencial cinematográfico» da obra presentada-, aínda que se decidiu non conceder o premio «ao non haber un texto que, na opinión do xurado, conte coa dimensión dramática suficiente a nivel formal e de contidos» para lograr «seducir unanimemente ao xurado para obter este recoñecemento».