A Costa da Morte presume de lingua e rende homenaxe aos seus propios autores

As Festiletras do Couto son, no seu 30.º aniversario, un referente en Galicia


carballo / la voz

A Costa da Morte é unha potencia en variedades dialectais do galego, e por iso presume de lingua cada 17 de maio a través de infinidade de actividades que se desenvolven dun extremo a outro da supracomarca. Pero tamén é un territorio orgulloso dos seus autores, algúns, como Gonzalo López Abente, protagonista do Día das Letras de 1971, e outros, como Enrique Labarta Pose, aínda pendente de obter o recoñecemento da Real Academia Galega malia a insistencia dos seus veciños de Baio. Os dous reciben cada ano a súa propia homenaxe. Onte, ademais, celebráronse ducias de actos en toda Galicia polo Día das Letras.

Pero é nunha pequena aldea do municipio de Ponteceso onde o Día das Letras Galegas acada cada ano a súa maior efervescencia. As Festiletras do Couto, organizadas dende hai 30 anos por un activo movemento asociativo, son hoxe un referente en Galicia. Ata o domingo están a pasar por ese pequeno recuncho Xosé Neira Vilas, As Cantareiras de Ardebullo, Jorge Mira, Xabier Díaz, Guadi Galego, Miguel Mato, Xabier P. Docampo e moitas outras figuras das artes e da literatura galegas.

O de onte foi un día especialmente concorrido, porque os veciños do Couto renderon homenaxe a tres Bos e Xenerosos -a actriz Uxía Blanco, o crego Xosé Pumar e o Mago Antón- e a trinta persoas que teñen colaborado coas Festiletras ao longo doutros tantos anos de historia. Onte naceron os premios Queixumes, pero renováronse vellas tradicións, como a de depositar flores aos pés do monólito que lembra a Eduardo Pondal -homenaxeado no Día das Letras Galegas de 1965- no adro da igrexa na que foi bautizado hai 177 anos. E renovouse tamén o compromiso dunha parroquia enteira co patrimonio da lingua.

López Abente

A Fundación López Abente tamén honrou onte a memoria do poeta muxián, finado no 1963. Un grupo de escritores fixeron de guías nun percorrido no que repasaron a historia de Muxía nos tempos de López Abente e a súa figura. A homenaxe ao autor quedou plasmada en dous momentos especiais; no primeiro descubriuse unha pedra gravada na que se le, ás portas da casa onde viviu, que alí morou López Abente, e a segunda é unha placa no cabo da Grixa, a zona onde naceu.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

A Costa da Morte presume de lingua e rende homenaxe aos seus propios autores