A RAG agradece a «rectificación» do Goberno central nos presupostos

Méndez Ferrín asegura que é «un triunfo da conciencia política galega»


redacción / la voz

O Goberno central dotará á Real Academia Galega con 682.000 euros no seu orzamento deste ano, 301.000 euros máis do que figuraba inicialmente no presuposto para este exercicio. A emenda introducida polo PP tras as propostas polo BNG e PSOE garante que a RAG terá un nivel orzamentario equiparable ao das institucións catalás e vascas.

O presidente da Real Academia, Xosé Luís Méndez Ferrín, asegurou onte que esta noticia comportaba para a institución «satisfacción e certa tranquilidade» e expresou o agradecemento a «todas as forzas políticas que evitaron que se cometera unha inxustiza».

Méndez Ferrín explicou que o cambio na partida orzamentaria destinada á RAG era «un triunfo da conciencia política galega» lembrando que os tres partidos con representación galega no Congreso manifestaran o seu apoio á institución que preside. Tamén subliñou Ferrín que é de agradecer que o PP desde Galicia presentase unha emenda que «rectificase unha situación» que, segundo xa tiña explicado en días pasados, «a ninguén lle parecería ben».

Para o escritor e presidente da Academia Galega o cambio na partida destinada á RAG supón que a galega «é tratada como calquera das outras academias». «Sempre pensamos que isto era de xustiza, pero non só para a Academia senón tamén para o país», engadiu Ferrín.

A equiparación da Real Academia Galega coas institucións similares, sobre todo a catalá e as dúas vascas, foi o argumento central nas emendas presentadas esta semana polas tres forzas políticas. Ferrín recordou que non se trataba de que a «Academia non acepte os recortes que todas están aceptando, senón de que recibamos o mesmo trato». Na circunstancia actual, e unha vez que a emendas presentada no Congreso polo PP sexa aprobada, a Real Academia Galega disporá dunha partida de 682.000 euros para afrontar un exercicio con moitos proxectos académicos e celebracións, como o 50 aniversario da creación do Día das Letras Galegas. Ferrín sinalou que «hai que agradecer o papel realizado polos deputados galegos en Madrid, de todas as forzas e do partido no Goberno».

«Temos que agradecer o papel realizado polos deputados galegos en Madrid»

Xosé Luís Méndez Ferrín

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos

A RAG agradece a «rectificación» do Goberno central nos presupostos