Galicia festexará na rúa o medio século de vida do Día das Letras Galegas


«O 17 de maio é a maior festa cultural europea polo seu carácter popular e participativo e agora entra na idade madura, no medio século». O presidente da Real Academia Galega, o poeta Xosé Luís Méndez Ferrín, subliñaba onte, na presentación dos actos conmemorativos do seu 50.º aniversario, o espírito aberto e plural do Día das Letras Galegas, nacido en maio de 1963 en plena ditadura.

«Isto é moito máis que unha roda de prensa. É un momento histórico. Estamos a celebrar os 50 anos do Día das Letras e vénseme á memoria 50 anos da miña vida, porque eu xa estiven nos actos do primeiro 17 de maio en Lugo, nun salón baixo un retrato de Franco e xunto ao gobernador militar de Lugo. Eu estaba francamente asustado», lembraba Ferrín. O presidente da RAG destacou a participación de La Voz de Galicia no aniversario da emblemática data e recordou a histórica relación entre a corporación e o xornal «desde a mesma fundación da Academia, entre outras cousas pola amizade de Fernández Latorre con Murguía e Martínez Salazar». La Voz sumarase á conmemoración, coa publicación dun libro dedicado ao autor homenaxeado este ano, Valentín Paz Andrade, e un suplemento especial sobre os 50 anos do 17 de maio.

O patrocinio das empresas

Á convocatoria da Academia tamén se unirán outros medios de comunicación, institucións públicas e empresas privadas, como Repsol ou Gadisa, que patrocinan a edición por parte da RAG do libro Todas as letras do Día das Letras Galegas, do que se distribuirán 30.000 copias entre os alumnos de secundaria de Galicia. O volume recolle un texto sobre cada protagonista da xornada escrito por un académico, segundo explicou o secretario da Academia, Xosé Luís Axeitos.

O secretario xeral de Política Lingüística, Valentín García, lembrou que «nin nas mellores perspectivas» podía pensarse naquel 17 de maio de 1963 que o éxito da iniciativa do escritor e fundador de Galaxia Francisco Fernández del Riego perduraría medio século despois.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

Galicia festexará na rúa o medio século de vida do Día das Letras Galegas