La Voz ofrecerá un libro cos mellores artigos de Casares

O volume poderá adquirirse co xornal por só un euro o vindeiro venres

la voz

O vindeiro venres cumpriranse dez anos do falecemento, en Vigo, de Carlos Casares. Galicia perdía unha das figuras que máis traballaron polo galego e a súa cultura, ademais dun dos escritores máis sobranceiros, tanto no eido literario como no xornalístico. A súa columna Á marxe en La Voz de Galicia, coa que acudiu puntual á súa cita diaria cos lectores durante 14 anos, foi un espazo de inmensa popularidade no que Casares ía debullando lembranzas, anécdotas, lecturas, viaxes e o seu día a día, converténdoo en literatura grazas ao seu dominio das técnicas do conto, que aplicou aos seus textos, e ao seu sentido do humor.

Para honrar a memoria do escritor, La Voz ofrecerá co xornal dese día un libro que recompila unha cumprida mostra do xenio que despregou Casares a diario en Á marxe. Trátase dunha escolma de 59 artigos, todos eles publicados na súa emblemática sección, agás Carta aberta a un político galego, na que o autor aborda o espírito que inspirou os primeiros anos da autonomía, e que lle valeu en 1983 o Premio Fernández Latorre. É tamén un dos textos nos que tratou a cuestión política dun xeito máis directo, porque nas súas columnas, como ben anunciaba o seu lema, prefería reservarse para esas pequenas cousas da vida que, non obstante, moitas veces son as de maior importancia.

Deste xeito, o volume Carlos Casares en La Voz de Galicia organiza os textos en grupos temáticos, dende o tratamento por parte do escritor da infancia -a súa propia e o mundo dos nenos- ás lembranzas de Xinzo e os seus habitantes, as súas viaxes, o encontro con Suecia e como inspirou o seu pensamento político e social, a gastronomía, as lecturas e os amigos escritores e a peculiar relación cos animais, representada especialmente polo gato Samuel, un dos personaxes favoritos dos lectores: resulta case apropiado que no derradeiro artigo que escribiu Casares, a véspera mesma da súa morte, se referise á cuestión de se os coellos beben auga ou non.

O volume, que se pode adquirir co xornal por só un euro, conta tamén con dez evocadoras ilustracións a cargo de Pinto?&?Chinto, Leandro, Abraldes, Kiko DaSilva, Siro, Xaquín Marín, Meixide, Xosé Tomás, Matalobos e Pepe Barro. Ademais, o libro ábrese cunha presentación da viúva de Casares e presidenta da fundación que leva o seu nome, e péchase cun epílogo escrito por Xosé Luís Barreiro Rivas. Completa o tomo unha introdución sobre o Casares articulista de Á marxe por Xesús Fraga, responsable tamén da recompilación dos textos e un retrato na capa do escritor no seu espazo íntimo, tomada polo tamén autor e amigo seu Ramón Loureiro.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos

La Voz ofrecerá un libro cos mellores artigos de Casares