«López Abente, como Manuel Antonio, era un poeta do mar»

Xesús Fraga
xesús fraga REDACCIÓN / LA VOZ

CULTURA

20 ene 2012 . Actualizado a las 07:00 h.

Gonzalo López Abente (1878-1963) escribiu un longo poemario, Bretemada, entre 1917 e 1922, pero os lectores tiveron que agardar ata o ano pasado para coñecer o contido deste libro inédito. A súa publicación por Alvarellos constitúe un «acontecemento literario de altísima importancia», segundo Xosé Luís Méndez Ferrín, presidente da Real Academia, onde se presenta hoxe (20.00 horas) o volume, con introdución, estudo e notas a cargo de Miro Villar.

-Vostede xa escolmara en 1995 unha antoloxía de López Abente. ¿Que engade Bretemada ao conxunto da súa obra?

-Complementa perfectamente a súa variedade temática. Trátase dunha obra cunha visión máis política e, ao mesmo tempo, máis histórica do feito galego. Na presentación en Muxía, Ferrín dixo que era un libro de poemas fondamente nacionalista. No tempo en que o escribiu López Abente participaba nas Irmandades da Fala, que entón abandonaban o culturalismo para configurarse como opción política. O que non cheguei a dilucidar aínda é a razón pola que permaneceu inédito, quizais porque no 23 empezou a ditadura de Primo de Rivera, aínda que segundo Ferrín iso non foi óbice para que se realizasen importantes iniciativas culturais.