A RAG pecha o ano Lois Pereiro con tres xornadas de congreso

Méndez Ferrín destacou que este congreso non é para chegar a «conclusións, senón para aprender as claves segredas de Pereiro que non foron descifradas»


a coruña / la voz

Un pormenor do poema Dous minutos nun baile de derviches, con correccións manuscritas de Lois Pereiro, ilustra o congreso que durante tres xornadas, de mañá ao sábado, analizará a figura do último homenaxeado do Día das Letras, e que está organizado pola Real Academia Galega, coa colaboración da Consellería de Cultura e a Universidade da Coruña.

Xosé Luís Méndez Ferrín, presidente da RAG, destacou que este congreso, que se inicia mañá na Cidade da Cultura, non é para chegar a «conclusións, senón para aprender as claves segredas de Pereiro que non foron descifradas» e gabou as figuras que participarán, xa que a primeira intervención é do catalán Pere Gimferrer e o peche corresponderá á autora galega Chus Pato. As dúas últimas xornadas faranse na sede da RAG na Coruña.

Francisco Rodríguez López, director xeral do Libro, felicitou onte, na presentación do programa, á RAG pola «valentía» que supuxo apostar por ese autor para celebrar o 17 de maio, que recoñeceu que foi «unha explosión da súa figura que ninguén podía prever», e do poeta dixo que aínda cunha obra «curta ten unha forza creadora excepcional, cunha estética profunda e desenvolta». Pola súa banda, Luís Caparrós, da Universidade coruñesa, destacou o «verniz de modernidade» de Pereiro que achegou este tipo de celebracións á xente moza. Mentres, o secretario da Academia, Xosé Luís Axeitos, avanzou que, fóra do programa, conseguiuse que Antón Reixa, amigo de Pereiro, presente o sábado e como colofón audiovisual do Congreso Lois Pereiro o seu proxecto Mundo Lois, sobre a figura e obra literaria do poeta monfortino.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

A RAG pecha o ano Lois Pereiro con tres xornadas de congreso