Os novos Premios da Crítica apostan pola creación arriscada

Entre os galardonados están Ana Romaní e Jorge Mira, colaborador de La Voz


vigo / la voz

O mapa formado polos renovados Premios da Crítica retrata unha paisaxe cultural inconformista e con gusto pola diversidade e o risco. Esta nova versión dos premios dados a coñecer en Vigo concéntrase en seis categorías para as principais disciplinas artísticas, distinguindo a creación e a investigación así como aquelas iniciativas de carácter cultural realizadas durante o ano pasado. A cerimonia de entrega reuniu a 400 persoas e foi guiada por Comba Campoy.

Estremas é o libro de máis recente publicación de Ana Romaní e foi o escollido polo xurado de creación literaria como o máis destacado do pasado ano. Para a escritora e periodista o Premio da Crítica supuxo «unha sorpresa» e explicou que o entendía como un recoñecemento para «todas e todos aqueles que traballaron para que haxa un outro horizonte nesta lingua». Romaní lembrou a necesidade da «liberdade, irreverencia e ousadía» e na súa reivindicación explicou que, se «nada nos protexe, todo nos reclama».

O premio da investigación foi para Jorge Mira polo seu traballo no estudo das similitudes das linguas en competencia e tamén polo seu labor de divulgación científica.

No apartado musical, a elección recaeu na orquestra folk Son de Seu, agrupación que dirixe Rodrigo Romaní e que, segundo o xurado, encontrou outro xeito de interpretar a música popular.

Nas artes visuais, o premio recaeu en Ángela de la Cruz «pola súa actitude renovadora e de risco na súa linguaxe deconstrutiva». En iniciativas culturais o premio foi para o Proxecto Terra polo impulso para a reflexión sobre o patrimonio e a paisaxe. No apartado de artes escénicas e audiovisuais o traballo escollido foi Citizen, de Chévere. Unha obra que, segundo o seu director, Xesús Ron, quere «reivindicar o teatro feito a man fronte ás industrias culturais». Considera Ron que tamén é unha reivindicación «do modelo de compañía residente» e dun tipo de teatro que «partindo da realidade é un xénero de ficción fronte aos que tendo que xestionar a realidade lévana á ficción irresponsablemente».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
14 votos

Os novos Premios da Crítica apostan pola creación arriscada