A consellería asegura que leva repartidos 455.000 euros en subvencións
19 oct 2011 . Actualizado a las 06:00 h.Non hai diñeiro para máis. Segundo Cultura, pechado o balanzo a setembro das contas da consellería, «non se poden afrontar novos gastos e hai que priorizar o pago dos compromisos adquiridos». Por este motivo, Cultura suspendeu onte a convocatoria de axudas públicas do pasado mes de maio destinadas a asociacións e fundacións de carácter cultural e que tiña unha contía total de 300.000 euros.
Segundo a consellería, a convocatoria aínda non fora estudada nin se comunicara en ningún momento cos posibles beneficiarios, polo que a súa suspensión o que impedirá é que se presenten novas peticións de axudas que, en principio, estaban destinadas a asociacións, fundacións e institucións, tanto a funcionamento como a actividades. Cultura sinala que a convocatoria se volverá a realizar no 2012, aínda que con criterios diferentes aos deste ano e con contías posiblemente menores.
Segundo o organismo autonómico, a orde que suspende a convocatoria de axudas ten que ver coa necesidade de equilibrar o presuposto existente e a necesidade de «priorizar nos compromisos que a consellería xa ten asumido».
Fontes da consellería sinalaron que non se trata de «deixar sen axudas aos colectivos culturais, nin ás fundacións», explicando que este ano 2011 xa se levan executados 455.000 euros en axudas con destino ás fundacións. A consellería engadiu que non haberá problemas coas axudas que xa están concedidas e cos convenios adxudicados. Segundo o departamento que dirixe Roberto Varela, esta medida non afecta a axudas xa concedidas e polo tanto tampouco a proxectos en marcha. Ao mesmo tempo que suspende a convocatoria das axudas destinadas a asociacións e fundacións, Cultura segue a anunciar próximas actividades dentro da programación da Cidade da Cultura e na illa de San Simón.
A consellería abriu en maio pasado a convocatoria de concorrencia competitiva. Este sistema pide primeiro que os interesados en conseguir axudas deben solicitalas xustificando o interese da proposta, a finalidade dos cartos, outras aportacións posibles e demais datos. Cultura, entre todas as peticións recibidas, escolle aquelas axudas que considera máis interesantes e descarta as restantes.
Para o PSOE, a decisión de suspender a convocatoria supón por unha parte contradicir a idea do goberno autónomo de blindar o gasto de carácter social. Por outra parte, segundo explica a responsable socialista de Cultura, Silvia Longueira, unha decisión así «debería ter sido consensuada cando menos co sector, posto que pon en perigo o mínimo funcionamento de grande parte dos colectivos do país». Para os socialistas, «habería que saber antes de aplicar a decisión como afectará aos colectivos e ao emprego cultural».
A área de Cultura da Deputación de Lugo denunciou o que considera un recorte «contra a cultura de base», sinalando que este departamento continuaría apoiando a cultura de base.