A Xunta de Galicia deu a coñecer a declaración institucional do Día das Letras Galegas, que considera unha celebración que representa a vitalidade e a enerxía da cultura do país.
No mesmo sentido, explica a declaración que a «vitalidade e a enerxía das nosas letras, da nosa cultura, está representada na figura do autor homenaxeado neste 2011». Sinala a Lois Pereiro como un escritor que aposta pola «modernidade e a vangarda, polas novas xeracións de escritores e poetas» e que «anova a tradición de excelencia da voz lírica de Galicia».
Tamén explica a declaración que «na curta pero intensa obra de Lois Pereiro os elementos propios de Galicia fúndense cunha cultura popular, urbana e posmoderna propia dos anos finais do pasado século. Os seus poemarios amosan un crisol de sentimentos compartidos, de referentes sen fronteiras, de linguas e terras que falan entre si».
Segundo o texto da Xunta, «Pereiro foi quen de extraer beleza da dor, de xerar ánimo da desesperanza, de crear vida da morte, e fíxoo con mestría e descarnada sinceridade».
A declaración institucional da Xunta sinala que «este 17 de maio a obra de Lois Pereiro representa a todo un país, a unha lingua e a un sistema literario. A Xunta de Galicia quere sumarse á merecida homenaxe ao escritor monfortino e facela extensiva a todos os homes e mulleres aos que lles correspondeu ao longo dos séculos o fermoso labor de sintetizar en palabras o sentir de millóns de galegos para construíren unha literatura propia e rica na que todos e cada un de nós podemos recoñecernos».