A coruñesa Andrea Maceiras gaña o Premio Meiga Moira cunha obra de amor e aventura
CULTURA
A coruñesa Andrea Maceiras Lafuente gañou a cuarta edición do Premio Meiga Moira 2010 de literatura infantil-xuvenil convocado por Baía Edicións coa obra Violeta tamurana, unha proposta para o tramo de idade de 12 a 16 anos.
A novela, que foi presentada baixo o lema Arquipélago, é unha historia trepidante que mestura a trama amorosa e a aventura no ámbito do fantástico e na que consegue crear un clima convincente entre as dúas realidades en que habitan os seus protagonistas. A obra ten un heroe moi definido, que vence as dificultades a través dunha forte vontade e un desexo firme de servizo e sacrificio pola comunidade humana á que pertence. Asemade, destaca tamén a figura do mentor, exemplo e guía para dar un sentido aos obxectivos marcados.
O xurado destacou que «é unha historia contada cunha narración limpa, enriquecida polo estilo poético, o que realza a innegábel beleza das descricións realizadas, especialmente do espazo natural que conforma o país do protagonista». A novela propón unha mensaxe non racista, poñendo en valor a tolerancia, sabedoría ancestral a fusión coa natureza.
A gañadora, que foi finalista do Premio Biblos-Pazos de Galicia 2010, recibirá 2.500 euros e a súa obra será publicada por Baía Edicións na súa colección Meiga Moira antes de finalizar o ano.
Por outra parte, o xurado valorou a alta calidade e cantidade das obras presentadas, «o que evidencia o extraordinario momento que vive a literatura en galego dirixida ao público infantil e o importante xermolo de escritoras e escritores que están dando para seguir facendo avanzar o galego como idioma literario e de uso vehicular entre os nenos».