O Pen Clube entregou os seus premios ás literaturas ibéricas

Gamoneda, Itxaro Borda e Francesc Parcerisas asistiron ao acto, no que faltou Lêdo Ivo


santiago/la voz.

A poeta e narradora vasca Itxaro Borda, o poeta castelá Antonio Gamoneda e o catalá Francesc Parcerisas recolleron no Pazo de Fonseca os galardóns da oitava edición dos Premios Rosalía de Castro que concede o Pen Club de Galicia con carácter bianual a autores e autoras das literaturas do ámbito ibérico en lingua castelá, catalá, vasca e portuguesa. En nome do poeta brasileiro Lêdo Ivo, que non puido acudir por problemas de saúde, recolleu a placa conmemorativa destes galardóns Manuel Rieiro.

A cerimonia deste encontro lingüístico e literario estivo presidida polo conselleiro de Cultura, Roberto Varela, que pechou o acto felicitando aos premiados «pola súa contribución á harmonía lingüística e á complementariedade das culturas que este acto simboliza e fai patentes». Roberto Varela entregoulle o premio ao poeta leonés e Premio Cervantes do ano 2006 Antonio Gamoneda, que agradeceu a distinción cun discurso no que insistiu na subxectividade «de mi verdad» e cuestionou a consideración da poesía «como literatura».

O reitor da USC, Juan Casares, fíxolle entrega da placa conmemorativa á escritora en lingua vasca, e o poeta catalá Parcerisas recibiu o seu de mans do secretario xeral de Política Lingüística, Anxo Lorenzo.

O presidente do Pen Galego, Luís González Tosar, introduciu a cerimonia e trasladou aos premiados un saúdo do escritor, membro do Pen e presidente da Real Academia Galega, Méndez Ferrín, que desculpou a súa ausencia por coincidir cun plenario da institución.

A laudatio dos homenaxeados correspondeulle facela ao poeta Miguel Anxo Fernán Vello, que falou de cada un deles e da súa obra despois de significar o valor simbólico destes premios «únicos no ámbito ibérico e que levan o nome da figura que encarna a personalidade do ser galego». Fernán Vello lamentou que non puidese viaxar a Santiago Lêdo Ivo, ao que considerou «unha das grandes voces poéticas das Américas».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

O Pen Clube entregou os seus premios ás literaturas ibéricas