O director francés Bertrand Tavernier aburre en Cannes cunha película de época
CULTURA
O Festival de Cannes deu onte o protagonismo a Bertrand Tavernier, un clásico do cine galo. Presentou A princesa de Montpensier , unha de aventuras de capa e espada, mentres que Mahamat Saleh Haroun estreou Un home que grita , unha denuncia social sobre a guerra civil do Chad.
Ao que se ve, Cannes segue apostando polas películas mamotreto. O último dos títulos en sumarse á lista é A princesa de Montpensier. Tavernier adapta unha novela curta de Madame de La Fayette, ambientada no século XVI. Con Mélanie Thierry, Lambert Wilson e Gaspard Ullied á fronte do reparto, a acción sitúase no reinado de Calos IX de Francia, cando as guerras de relixión entre papistas e hugonotes causan estragos. Marie de Mézières, unha das herdeiras máis enriquecidas do reino, está namorada do novo duque de Guise, o Acoitelado.
Argumento
O seu pai, o Marqués de Mézières, guiado pola ambición de mellorar a posición da súa familia, obrígaa a casar co príncipe de Montpensier, a quen ela non coñece. Este último é chamado por Carlos IX para unirse aos príncipes na súa guerra contra os protestantes. Para protexer á súa nova esposa, envíaa en compañía do conde de Chabannes, o seu preceptor, a un dos seus castelos máis recónditos, Champigny. Marie, insatisfeita, non pode esquecer a Guise, quen, en compañía do duque de Anjou, futuro Enrique III, pasan unha tempada en Champigny, onde Montpensier se reuniu con Marie. Anjou tamén queda prendado á súa vez da princesa, fronte á cal sucumbe Chabannes... A princesa converterase entón no centro de todas estas paixóns rivais e violentas. Tavernier dá un toque feminista a unha historia correcta, contada con moito oficio e cun certo clasicismo, pero impersoal.
A sorpresa
A sorpresa do festival xurdiu coa película do Chad. Rodada cunha notable economía de medios e unha visión case neorrealista da vida cotiá no país, Mahamat Saleh Haroun conta na película Un home que grita a historia dun home que non se quere implicar nos acontecementos do seu país, envolto nunha guerra civil.