A novidade radica en que a iniciativa editorial parte dun bar de Compostela, o Café Bar 13, que xa leva editados tres libros dentro deste orixinal proxecto.
02 abr 2010 . Actualizado a las 02:00 h.«En xeral, a vida é marabillosa. Diante sempre hai pedra. A pedra dun convento ou dun muro. Vivimos nun lugar. E no lugar hai moita pedra que hai que aproveitar». Con esta reflexión de bar convertida en libro arranca Acantilado, unha obra de Carlos Santiago que é o primeiro título dunha orixinal colección titulada O Lapis do Taberneiro . A novidade radica en que a iniciativa editorial parte dun bar de Compostela, o Café Bar 13, que xa leva editados tres libros dentro deste orixinal proxecto.
«A idea naceu no bar coma un xogo -explica Carlos Santiago, un dos promotores desta iniciativa chamada Edicións do Trece e autor da primeira obra-. Eu púxenme a escribir alí unha novela no tempo libre nun pequeno caderno de oito por trece centímetros e o dono do bar, José Silva, díxome: 'Imos publicala'». Acantilado sentou de alí en adiante as bases da colección: relatos dunha extensión máxima que rolde as cen páxinas «para que se lea rápido e facilitar a lectura tabernaria» e sempre ambientados nunha taberna. Os libros publícanse no mesmo formato de oito por trece da versión orixinal. Os primeiros trescentos exemplares do libro de Carlos Santiago despacháronse, por tres euros, en apenas un mes a través do mostrador para acompañar os cafés e as cañas e en Internet a obra leva máis de cinco mil descargas, xa que a colección se pode ler ou baixar a través do servizo editorial web de Calameo.
«A pretensión de todo isto non é comercial, senón realzar o aspecto comunitario arredor dunha taberna nun barrio de Compostela», di Santiago acerca desde «fenómeno de literatura marxinal».
«Eu xa fago pequenas tolerías deste tipo, non é nada incoherente na miña traxectoria. Gústame facer cousas con máis valor social que mercantil», explica Carlos Santiago.
O segundo dos títulos presentados na colección foi Trece xogos , de Mingolo Alborés, unha historia sobre o mundo do xogo na taberna; e o último deles, O decimo terceiro mes , de Raquel Miragaia, unha historia de amor que nace entre copas de viño. «Os dous libros seguintes irán por camiños máis humorísticos», di o editor, que destaca o especial ambiente que se crea nas presentacións de cada obra, que tamén teñen lugar neste local de clientela bohemia e variopinta.
Ademais, despois do éxito acadado, estanse preparando as segundas edicións dos dous primeiros títulos da colección e hai xa varias reservas feitas por parte de xente que quere ter a colección completa.