Albalat fixo un proxecto para este edificio do século XVIII da cidade vella da Coruña no que se instalaría o arquivo
21 feb 2010 . Actualizado a las 02:00 h.A Real Academia Galega ten a súa sede na que fora a casa da escritora Emilia Pardo Bazán e desde o ano 2007 os seus responsables contan con outro espazo, tamén de fonda pegada dentro da cultura galega, como é a casa na que viviron nos anos 1872 e 1873 Rosalía de Castro e Manuel Murguía, este último fundador e primeiro presidente da institución académica. O edificio do século XVIII foi adquirido por Caixa Galicia e cedido á RAG no mes de marzo do 2007, mediante un acordo asinado polas dúas entidades.
A reforma para converter este edificio na segunda sede da Academia, situada ademais a moi pouca distancia da actual, empezou pola laboración dun proxecto das obras a cargo dun dos membros numerarios da institución, o arquitecto Andrés Fernández Albalat, e a demolición dalgúns espazos interiores do inmoble.
E aí acabou todo porque aínda que a finais do 2008 estaba previsto que entraran en funcionamento estas novas dependencias o certo é que a reforma está paralizada por falta de orzamento xa que, segundo recoñecen os propios membros da Academia, a entidade ten outras cuestións do funcionamiento diario as que atender.
Entre ese funcionamento diario están algúns arranxos básicos que vai precisando a sede actual aínda que practicamente as únicas obras que se fixeron en moito tempo foi o acondicionamento do salón de actos da Academia na que se recuperaron «aquelas pedras que teñen un recendo a Pardo Bazán», apuntaba un académico. Así, o espazo que serve de espello para as actividades máis solemnes da entidade, recuperou a pedra vista das paredes da planta baixa, ata entón tapadas por capas de pintura.
As obras foron feitas hai preto de dous anos co fin de mellorar a imaxe dun espazo no que un dos últimos actos solemnes foi a recepción como académico de honra de John Rutherford ou a sesión de elección do novo presidente da Academia, Xosé Luís Méndez Ferrín.