O poeta arxentino Juan Gelman vén de ser elixido escritor galego universal pola Asociación de Escritores en Lingua Galega, atendendo non só ao altísimo valor da súa obra, senón tamén «porque representa un pouco a todos os exiliados por ter loitado na defensa dos valores humanos nos seus países», segundo manifestou o presidente da AELG, Cesáreo Sánchez.
A distinción entregaráselle no transcurso da Cea das Letras, no vindeiro mes de maio, nun dos actos máis importantes na vida da asociación, xunto cos premios AELG, uns galardóns concedidos polos propios escritores. O premio escritor galego universal, que xa recibiron antes Elena Poniatowska, Nancy Morejón, Pepetela e Mahmoud Darwish, concédeno os autores galegos para recoñecer a calidade literaria dun escritor e o valor ético da súa traxectoria, de modo que poida terse por un referente para todos. Algunha vez se ten dado que o galardoado ten algún tipo de relación con Galicia, pero a idea do galardón é a de asociar o nome desas grandes figuras internacionais ao noso país.
Poeta, periodista e tradutor exiliado en México, Juan Gelman ten demostrado ser un mestre dese «oficio ardente» que para el é a poesía, un xénero que combina coa súa actitude cívica e a súa constante denuncia das violacións dos dereitos humanos.
Gelman é o poeta arxentino máis premiado da súa xeración, a dos anos 60-70, merecendo galardóns como o Nacional de Poesía arxentino, o de Literatura Latinoamericana e do Caribe Juan Rulfo, o Iberoamericano de Poesía Pablo Neruda, o Reina Sofía de Poesía Iberoamericana e o Premio Cervantes 2007.