As dúas principais editoriais galegas xa teñen á venda títulos electrónicos. Esta semana inauguraban a posibilidade e mentres Xerais ofrece dúas das súas últimas novidades en formato dixital, Galaxia ofrece xa catro títulos. Os últimos libros de Diego Ameixeiras e Suso de Toro, Dime algo sucio e Sete palabras, respectivamente, poden mercarse en Todoebook.com seleccionando como editorial a Xerais. No mesmo lugar poden comprarse os catro títulos que ten incorporados Galaxia. A Esmorga, de Eduardo Blanco Amor, e mais a novidade da novela que deixou escrita antes de morrer Anxo Rei Ballesteros, A noite do moucho.
Ademais, forman parte tamén das primeiras dixitalizacións desta editora dous libros de Ramón Otero Pedrayo, Rosalía e Entre a vendima e a castañeira. No caso dos libros de Galaxia o prezo de venda non chega aos nove euros, mentres que no caso de Xerais os dous volumes publicados neste formato oscilan entre os once e os trece euros.
A intención das dúas editoriais é incorporar títulos dos seus fondos a este formato e mais ir editando xa as novidades en papel e tamén no formato dixital.