Premiado co Pedrón de Ouro o labor de recollida e divulgación da cultura popular de Mini e Mero
CULTURA
Case corenta anos levan Mini e Mero recompilando historias e músicas populares por Galicia adiante. Este traballo, silencioso as máis das veces, foi distinguido onte co Pedrón de Ouro, que anualmente a persoas e traballos a favor da cultura galega. O Pedrón de Honra foi concedido á filóloga romanesa Mariana Ploae-Hanganu pola difusión do galego no seu país.
Para Mini e Mero o premio supón o recoñecemento a un traballo de carácter tranquilo e longo, de moito escoitar e moito viaxar segundo os dous integrantes deste dúo que, ademais forma parte tamén do grupo musical A Quenlla.
Mini e Mero, Xosé Luís Rivas e Baldomero Iglesias, son parella de feito artística desde aqueles anos en que fundaron o grupo de folk Fuxan os Ventos. Naquela época xa andaban polas parroquias de Galicia á escoita de coplas e alalás, de poemas populares e de historias que o mesmo valían para cantar no traballo ca na diversión. Segundo eles explican, «o patrimonio oral galego é tan amplo que ten para todos os paus posibles». Tamén subliñan que ten «cancións para o labor e cancións para o lecer».
Unha parte do traballo de Mini e Mero durante estes anos foi recoller, o que significa, segundo explican, que «hai que escoitar moito, haque gañar a confianza da xente, porque hai veces que as persoas non lle dan valor aos cantos vellos».
A segunda parte do traballo do dúo e a divulgación deste patrimonio e, neste sentido, Mini e Mero levan anos dando a coñecer o que xa debería ser coñecido. O mesmo cantan en asociacións de veciños que en teatros e auditorios, explican parte por parte o seu repertorio para demostrar ata que punto pode dar si.
Mini e Mero subliñan que o seu traballo destes anos permitiulles «ter un coñecemento moi grande da Galicia rural o que non deixa de ser un luxo para nós».