Os gañadores dos Xerais reclaman máis visibilidade para a literatura

Os tres autores coinciden en que ?o papel dos galardóns ?é fundamental para ?a difusión das obras


Escribir un libro, gañar un premio e esperar polos lectores. Nesta circunstancia están as dúas autoras e o autor que este ano gañaron os tres premios convocados por Xerais. Manuel Lourenzo González, que acadou o premio de novela; Marilar Alexandre, que gañou o Fundación Caixa Galicia de literatura xuvenil; e Mar Guerra, que debuta como escritora obtendo o Merlín. As circunstancias dos tres gañadores son diferentes, pero van coincidindo en algunhas visións sobre a literatura.

No primeiro no que coinciden é nese dobre proceso que o autor de O xardín das pedras flotantes considera complementario, «un proceso é escribir o libro, inventar a historia, que para min é o pracenteiro, e o segundo é poñelo bonito e dalo a ver, que non se disfruta tanto, pero hai que facelo».

A outra coincidencia é que os tres consideran que os premios seguen sendo imprescindibles e que a motivación principal é «conseguir que a historia chegue aos lectores», como explica Mar Guerra, autora de Xenaro e o misterio da mochila verde. Lourenzo apunta na conversa que «hai un efecto de reforzo para o traballo do escritor cando un xurado escolle un libro seu». Para Marilar Alexandre, autora de A cabeza de Medusa, «esa escolla significa que alguén gustou do texto, por máis que sabemos que con outro xurado o resultado podería ser outro».

Marilar Alexandre apunta que os premios son, aínda, «a principal arma para combater a falta de visibilidade da literatura galega, que aínda ten que facerse un oco nas vidreiras». Unha visibilidade que, segundo a escritora, «é aínda máis importante no caso dos autores novos».

Os tres son gañadores de premios a libros inéditos, pero preferirían que houbese máis galardóns á obra publicada. Asegura Lourenzo González que «é máis gratificante o premio ao que non te presentas, pero tamén é certo que neste tipo de convocatorias hai vicios de funcionamento que invalidan en parte a súa función». Para Mar Guerra, os premios a libros publicados deberían darse «en condicións de laboratorio para evitar as suspicacias e que a súa referencia sexa válida».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

Os gañadores dos Xerais reclaman máis visibilidade para a literatura